【中國點點點──閒話粵語#33】團結抵制好辦事
2017-06-16

1905年嘅「拒約運動」觸發萬千中國民眾抵制美貨,但上集《閒話粵語》同大家提過,並唔係所有人都係真心真意參與抵制,可能只係為咗迎合大眾,以免激起民憤,所以逼住參與。

民心難一致團結,當時嘅熱血青年亦都為此感到有啲沮喪,佢哋如何用粵謳抒發呢?



程美寶教授今集就同我哋介紹一首粵謳,名叫《聽見話抵制》,係講當時推動抵制行動嘅人,希望用文字觸動民眾,鼓勵佢哋唔好放棄抵制,團結一致槍口對外。

《聽見話抵制》 詞:桂侶

聽見話抵制,已有半年多。

做乜中華廿一省,都奈佢唔何?

 

團體總要結成,呢陣有誰個打破,

重要堅持到底,咪個咁就收科。

喺清末,陸續有人為推動社會運動,而結成一個個「團體」,呢種結社模式,係一種新現象,而「團體」對當時而言亦係一個新詞彙。

記得係拒約勿負初終,唔好懈惰。

至怕嗰啲血涼動物,自己蹉跎。

呢度提到嘅血涼動物,相比起「冷血動物」,啲血熱少少,但係都係無好積極參與呢場運動,程美寶表示,呢度係意有所指,指責當時一啲嘅商家、官員違背承諾,冇主動抵制美貨,變咗喺度蹉跎歲月。

你哋睇吓嗰個馮君殉約,咁就聲名播。

若果你哋全無思想,問你點對得住嗰三位哥哥 (指馬、潘、夏)

眼見民眾同官府都有啲冷淡,唔少熱血青年都好心急如焚,擔心拒約運動無疾而終。而上面提到嘅馮君,全名馮夏威 (1881-1905),佢係南海沙頭人,1895年跟隨父親到美國做鐵路苦工。1905年,馮夏威回國參加拒約運動,喺上海美國總領事館門前服毒自殺殉約,以表義憤。馮夏威之死,將拒約運動推向高峰,但係熱情總有點無以為計,所以寫呢首粵謳嘅人,就借馮君之死,希望大家唔好辜負呢位義士生前願望。

不過想你共表同情,唔用佢嘅美貨。

咁嘅文明抵制,都算得極係平和。

今日杯葛例行,唔係叫做闖禍。

哎,須要想過,華民非只我。

試念吓嗰啲旅美同胞,受幾許折磨。

嚟到最後,作者都變得「低聲下氣」,希望民眾知道,參與運動嘅人只係想推動「文明抵制」,唔想一個咁簡單嘅行動失敗告終。而歌詞提到「杯葛」,就係從英文boycott音譯而成嘅中文字,喺當時開始大行其道,成為粵語嘅一部分。

而喺香港,當時皇仁書院嘅學生亦都曾經參與呢場愛國行動,可見中港兩地總會以某種方式,聯繫彼此。

 


中國點點點星期一至五 下午三點至四點半

編導:張鳳萍

監製:葉冠霖

【中國點點點】張鳳萍、黃曉玲、王 磊、劉銳紹、鄭漢良、呂秉權主持。每日話題由中國政情、至網絡熱話、旅遊、生活、閱讀,讓聽眾輕輕鬆鬆,每天對祖國知多一點點。

常設環節

星期一:最緊要識法、領導點點菜

星期二:對談中國

星期三:中國討論區;同聲同氣談天說地

星期四:點點評論;閱讀中國

星期五:漫遊中國;閒話粵語

專題分類:中國熱話
發表評論

最新專題