【香港家書@20190803】中大公共衛生及基層醫療學院副院長 黃至生
2019-08-03

親愛的阿聰:

你好,近來工作還順利嗎?自從你加入中大醫學院嘅癌症教育義工團隊,轉眼已經有十年了。我真係好衷心多謝您同一衆義工嘅無私付出和熱誠。您亦向政府近來公布嘅「香港癌症策略」提出了唔少問題,我嘗試在此跟你分享一下自己嘅睇法。

 

其實政府所制訂的癌症策略確實對整個社會及公共衛生帶來了非常正面嘅影響。癌症是香港的頭號殺手,也是全球第二大主要死因。在大部分國家及地區,它都會被視為主要的公共衛生議題。2018年,癌症佔全港死亡人數近三分之一。處理癌症相關議題時,監察、預防、治療及紓緩四大範疇被認為是首要目標,但隨之而來的挑戰不容忽視。眾所週知,年老者隨著年齡增長,患癌症的機率大大高於年輕人。鑑於本港嚴重的老年化現象,未來數十年,可以預見癌症新增個案數目會持續攀升。

另一方面,隨著時代的變遷,癌症患者的病情複雜性與日俱增。這些都令本港醫療服務需求急劇上升,繼而出現醫療資源不足的情況,對醫療系統造成日益沉重的負擔,最後對病人以至整體社會均構成重大壓力。另外我哋都知道肥胖、多肉少菜、吸煙、酗酒以及少運動等都屬於癌症嘅高危因素,但係喺診症室內醫生要改變病人生活摸式,成效其實相當有限。曾經有病患者接受一位醫生同事嘅建議減肥,但病人回應他的肥胖屬於家族性遺傳,拒絕任何意見。亦有吸煙者對醫護人員話,戒煙會更易導致早死。究竟我們可以做什麼改變這些想法呢?

最近,為了減輕癌症對社區帶來的負擔,以及改善癌症病人生活質素和提高他們的存活率,政府制訂了防控癌症工作的優次和方向。當中最值得留意的是五大本港最常見癌症的高危因素及普查計劃,我認為教育和提高意識,對於普羅大眾有效預防癌症,是非常重要的一環。但係要達致預期嘅效果,市民嘅積極參與包括健康生活習慣及定期驗身等,實在不可或缺。

阿聰,你以往也曾遇到有朋友因為怕驗出癌症而乾脆唔參加癌症篩查計劃,甚至覺得根本無任何唔舒服,為何需到診所見醫生。這些觀念令篩查計劃嘅成效大打折扣。癌症篩查服務,實在是預防癌症嘅重要措施。你問我點解政府只資助某些癌症篩查。其實在制定全民篩查計劃時,必須以實證為本,所考慮嘅因素相當多。

例如所篩查嘅癌症必須係常見同重要嘅、發現時一般可以及時醫治並延長壽命的、所使用的篩查工具必需準確和為人接受嘅,檢查嘅風險低、也具有較高嘅成本效益,以致公帑可以用得其所。以往也有病人希望做全身檢查,篩查身體上可能罹患嘅所有癌症,卻未必明白現時國際指引暫時只建議大腸癌和子宮頸癌篩查,以及略為有爭議性嘅乳癌。

綜合目前的醫學證據,暫時沒有百分百國際上的指引支持增加額外的癌症篩查種類,例如乳癌。所以正如「香港癌症策略」所言,我們需要癌症學術研究的注資,建構未來醫學更進步、更尖端嘅癌症政策。

另外,有一些癌症病患者的需要,都並唔係只在醫院診症時可以完全處理,例如患癌後嘅社交生活,情緒抑鬱和管理,以及實質支援,未來都可以繼續透過「醫社合作」,適切運用社區資源,以達致最高質素的長期疾病護理。

祝身體健康、生活愉快,一同為社區健康出一分力!

黃至生教授

2019年8月3日

【聲音完全版】


【香港家書】

香港電台第一台FM92.6 - 94.4​星期六早上九點至九點二十分

主持:陳顥之、陳亮均、張鳳萍
編導:陳顥之、陳亮均、張鳳萍
監製:林嘉瑜

學者、議員、官員及社會人士透過書信形式,分析社會現象,細訴個人感受

專題分類:專題文章
發表評論

最新專題