【中國點點點──閒話粵語#24】誰人薄情誰折墮?
2017-04-14

今集程美寶教授延續粵謳嗰份纏綿,同大家演譯多兩首情歌,感受當時歌姬嘅多愁善感。



第一首叫《唔好熱》,題材雖然係講緊天口好熱,但最後都係會返到去講男女關係,唔可以逼得太緊。

 

《唔好熱》(節錄)

唔好咁熱,熱極會生風。

我想天時人事,大抵相同。

唔信你睇回南日,久就有涼風送。

共佢好極,都要離開,暫且放鬆。

 

跟住呢一首,程美寶教授再開金口。細聽佢嘅演繹,就會發現每一句都會有一粒字係特別拉長,志在表達嗰份哀怨。大家亦可以留意吓,每一句無論有幾多個字,最後一粒字都係押韻,呢個係粵謳嘅最大特色。

 

《心點忿》

心…心點忿,折散絲羅。

怨一句,紅顏。怨一句,我哥。

世界做得咁情長,做乜偏偏冇結果。

就把舊時個種恩愛付落江河。

共你相好到入心,又被朋友架禍。

因愛成仇,你妹見盡許多。

試睇人哋點樣子待君,君呀你就回想吓我。

從頭想過,正好共我丟疏。

天呀,保佑邊一個薄情就好,邊一個折墮。

唉,真正冇錯。

免使枉死含冤,受此折磨。

 


中國點點點星期一至五 下午三點至四點半

編導:張鳳萍

監製:葉冠霖

【中國點點點】張鳳萍、黃曉玲、唐偉傑、劉銳紹、鄭漢良、呂秉權主持。每日話題由中國政情、至網絡熱話、旅遊、生活、閱讀,讓聽眾輕輕鬆鬆,每天對祖國知多一點點。

常設環節

星期一:最緊要識法

星期二:對談中國

星期三:中國討論區;同聲同氣談天說地

星期四:點點評論;閱讀中國

星期五:漫遊中國;閒話粵語

專題分類:中國熱話
發表評論

最新專題