【中國點點點──閒話粵語#28】外江佬敲自由鐘
2017-05-16

上集提到清朝嘅廣東人愛用粵謳諷刺時弊,有人寫咗一首《顛地鬼》「唱衰」做鴉片貿易嘅西洋商人。今次香港城市大學中文及歷史學系教授程美寶帶我哋去到幾十年後嘅晚清,睇吓步入動亂歲月嘅人民,如何用粵謳抒發憂國憂民之心。

 



程美寶教授話,《顛地鬼》屬於較早期流傳嘅粵謳,所以係靠口耳相傳,後期再有人手抄流傳到後世。

但去到晩清,隨著印刷技術逐漸成熟,民間出現「新媒體」──報紙。十九世紀中葉,亦即清同治年間,出現「鉛印」(活字印刷),以及更重要嘅「石印」技術,令報紙可以大量印刷,而唔係以往嘅木刻技術。

報紙成為大眾媒體,粵謳亦都有載體可以喺民間流通。程美寶指出,當時嘅報人會以粵謳、南音作為一種表達方式,灌輸新聞內容到歌詞當中。佢就為我哋揀嚟一首《珠江月》,係由筆名「外江佬」嘅文人所撰寫。

歌詞開首係講欣賞珠江月色,但只為拋磚引玉,整首粵謳嘅「戲肉」係慨嘆晚清中國嘅亂象,希望明白歌詞嘅人可以企出嚟捍衛國家,爭取更自由嘅政體。程美寶指出,晚清嘅民間流行一個象徵──「自由鐘」,唔少晚清嘅雜誌如果有插圖,就會見到呢個「自由鐘」,寓意敲醒國民,改變國家。《珠江月》都有出現呢個象徵。

以下係《珠江月》原文 (節錄):

珠江月,照住船頭。

你坐在船頭,聽我唱句粵謳。

 

人哋唱個啲粵謳,都唔係舊。

我就新名詞譜出,替你散吓蝶怨蜂愁。

你聽到個陣款款深情,就算你係鐵石心腸,亦都會仰着天嚟搔吓首。

捨得我銅琵鐵笛,重怕唔喚得起你敵愾同仇。

 

只為我中國淪亡,四萬萬同胞問邊一個來救?

等到瓜分時候,個陣就任你邊個都要作佢嘅馬牛。

你睇我咁好河山,如錦綉。

做乜都無個英雄獨立,撞一吓鐘,嚟唱一下自由。

 


中國點點點星期一至五 下午三點至四點半

編導:張鳳萍

監製:葉冠霖

【中國點點點】張鳳萍、黃曉玲、王磊、劉銳紹、鄭漢良、呂秉權主持。每日話題由中國政情、至網絡熱話、旅遊、生活、閱讀,讓聽眾輕輕鬆鬆,每天對祖國知多一點點。

常設環節

星期一:最緊要識法

星期二:對談中國

星期三:中國討論區;同聲同氣談天說地

星期四:點點評論;閱讀中國

星期五:漫遊中國;閒話粵語

專題分類:中國熱話
發表評論

最新專題