【中國點點點──閒話粵語#34】團結民間靠貪官
2017-06-23

1905年,時值晚清嘅「拒約運動」,本質上係一場愛國民族主義抗爭,號召中華兒女抵抗美國嘅不平等對待。但後來點解會逐步演變為打倒清廷嘅革命?今集《閒話粵語》,程美寶教授就同大家唱出呢段歷史。



1906年,美國人出資承辦粵漢鐵路,廣東、湖南、湖北三省嘅仕紳同民眾,合力提倡收回鐵路自辦。當時廣東省民眾選出嚟自順德嘅「大紳」黎國廉做代表,到武昌與時任湖廣總督嘅張之洞談判、會商。最終,鐵路決定由三省自辦,湖北為官辦、湖南紳辦,廣東則為商辦。

當時廣東糧餉乾枯,缺乏經費,需要向民間及商家招手集資。有反對政府嘅民眾認為,時任兩廣總督岑春煊意欲假借築路,承機斂財,岑更強逼接收商辦嘅粵漢鐵路權,激起眾怒。

黎國廉作為民眾代表,佢負起責任駁斥岑春煊嘅做法,卻被岑逮捕入獄。

呢一件就成為「粵路風潮」嘅導火線。因為黎國廉係「大紳」,亦即有功名嘅人,唔應該被隨便逮捕。民眾對官府嘅憤怒爆發,喺短時間內集資夠三百多萬元,入股粵漢鐵路,刑成官民商爭利格局。

程美寶教授就搵嚟以下呢首粵謳,講述粵路風潮時期民眾如何受官府刺激,而踴躍參與入股一事。

《真正踴躍》 作者:戇叟

真正踴躍,都係認股箇中人。

黎紳受屈,只望我哋把氣來伸。

 

認股若係延遲,人哋就話你涼血嗰部分。

你睇吓下流社會,尚且認得咁精神。

你話官府勒捐,誰個不憤?

就係花林賤品,亦表同心。

股夠就商辦得成,唔在肉緊。

 

唉!休痛恨。

若係有法籌錢,多認幾份。

要知到此事係官民交訟呀,罷手唔能!

 

最後一句嘅「官民交訟」,就係當時民間將「粵路風潮」定性為官民互相對立嘅證據,因為官府喺呢件事上已經唔再企喺民間一方,令群眾唔單只係對抗美國人,變成國家同社會嘅矛盾。

呢件事只係前奏,後來官府採取更強烈嘅打壓,但同時激起民憤,究竟發生咩事?下回分解。

 


中國點點點星期一至五 下午三點至四點半

編導:張鳳萍

監製:葉冠霖

【中國點點點】張鳳萍、黃曉玲、王 磊、劉銳紹、鄭漢良、呂秉權主持。每日話題由中國政情、至網絡熱話、旅遊、生活、閱讀,讓聽眾輕輕鬆鬆,每天對祖國知多一點點。

常設環節

星期一:最緊要識法、領導點點菜

星期二:對談中國

星期三:中國討論區;同聲同氣談天說地

星期四:點點評論;閱讀中國

星期五:漫遊中國;閒話粵語

專題分類:中國熱話
發表評論

最新專題