【中國點點點──閒話粵語#35】粵語神曲(清末版)
2017-06-30

上集提到1906年,廣東爆發「粵路風潮」,正式形成官民對立嘅格局。當時廣東政府拘捕民眾嘅代表黎國廉入獄,激起眾憤。

當時嘅新聞紙已經成為民眾嘅發聲平台,佢哋會點樣用歌詞抒發不滿呢?

 



程美寶教授就喺《時事畫報》搵到以下呢首粵謳,呼籲官府唔好「有恃無恐」,以為拘捕咗一個大紳,民眾就會因此就範,反而因為黎國廉本身就係有功名嘅人,令官府埋下革命嘅伏線,因為觸動紳商嘅利益。

 

《唔好咁恃》 作者:隱諳

唔好咁恃。呢陣知錯唔曾。

你記否冒夜洶洶,咁就去捉大紳。

究竟大紳何罪,想你亦心難問。

不過為熱中邀寵啫,故此咁頻「侖」。

 

你睇吓南令幾咁參詳,唔肯同你咁混沌。

故此謗無人分,只係罪在你身。

你想學避弋嘅飛鴻,天外翩奮。

總係宦海驚潮,渡亦不能。

今日參肉恩臠,人所共憤。

 

唉!真正係笨,觸犯紳商恨。

你莫不是豺狼成性呀,獸類同羣。

 

喺歌詞入面,會見到一個詞語「頻『口侖』」,『口侖』嘅讀音同「能」類似,呢個詞語就係當時形容「心急」、「驚慌」嘅用語,時至今日都仍有人會講。亦會見到「混沌」 (音:溫燉),就係指「愚蠢」嘅意思。

從以上用字,可以見到當時官府係靠拉黎國廉虛張聲勢,事實上可能係驚到失去方寸。

睇見呢啲新聞字,一首首粵謳既押韻又入腦,而且「我口唱我心」,可能比起任何粵語神曲,更加容易引起民眾共鳴。

 


中國點點點星期一至五 下午三點至四點半

編導:張鳳萍

監製:葉冠霖

【中國點點點】張鳳萍、黃曉玲、王 磊、劉銳紹、鄭漢良、呂秉權主持。每日話題由中國政情、至網絡熱話、旅遊、生活、閱讀,讓聽眾輕輕鬆鬆,每天對祖國知多一點點。

常設環節

星期一:最緊要識法、領導點點菜

星期二:對談中國

星期三:中國討論區;同聲同氣談天說地

星期四:點點評論;閱讀中國

星期五:漫遊中國;閒話粵語

專題分類:中國熱話
發表評論

最新專題