【中國點點點──閒話粵語#37】辛亥革命的前哨戰
2017-07-14

經歷「拒約運動」、「粵路風潮」等多次民眾運動,中國喺二十世紀頭十年,逐步累積革命嘅力量。當時嘅報章如何紀錄大時代?

香港城市大學中文及歷史學系教授程美寶搵嚟一首十分悲壯嘅粵謳,係記錄辛亥年 (公元1911年) 年初嘅黃花崗事變,即刻聽吓佢嘅演繹:



時值1911年初,同盟會會員由各地集中香港,陸續潛入廣州,喺農曆辛亥年三月廿九日發動武裝起義,但因為防軍遲遲未能接應,以及其他各種原因,包括有官府臥底潛入團體內,最終被清軍鎮壓而事敗。

其後,多人被政府捕殺,程美寶翻查史料,指出死難嘅同盟會會員有名可考者達86人,當中72人嘅遺骸由早幾集曾經出場嘅《時事畫報》創辦人潘達微,聯同其他人出面收葬。佢冒死發動廣仁善堂收集烈士遺骸,以及以房契做抵押,將廣州東郊紅花崗買落嚟。

參加起義嘅人滿腔熱血,平均年齡只有29歲,其中9人係留日學生,出身良好家庭。程美寶表示,根據文獻,當時潘達微等人認為,秋日黃花,更能比喻烈士不屈嘅品格,所以佢哋將「紅花崗」,改名為「黃花崗」,而起義亦稱為「黃花崗起義」,以及「黃花崗3.29事件」。

從以下呢首粵謳,更見潘達微等人嘅悲怨。

《黃花影》 (載於1911年10月3日《南越報》諧部)

黃花影,尚帶住的血痕鮮。

 

顧影知是英雄,且屬美少年。

試睇英姿瀟灑,慷慨兼剛健;

枝傲橫秋,可見得佢骨節堅。

秋風秋雨,日把黃魂練;

不比春花嬌媚,只係乞人憐。

 

人見佢自由花放,個個心欽羨;

須知有許多萌蘖,蹴損在春天。

呢吓北顧燕雲,重係多幻變;

須整便,齊與金風戰;

 

待到凱歌高唱,痛飲在花前。

程美寶指出,「粵謳」呢一種文學形式,喺當時有另一個名稱──「解心」。頭幾句一定係哀怨,但最後幾句,就係要抒解心結。《黃花影》嘅最後幾句,就係為求達到呢個目的,話畀眾人知道,最後起義一定會成功,大家會「飲得杯落」。可見,除咗解心,亦要達到政治宣傳之效。

 


中國點點點星期一至五 下午三點至四點半

編導:張鳳萍

監製:葉冠霖

【中國點點點】張鳳萍、黃曉玲、王 磊、劉銳紹、鄭漢良、呂秉權主持。每日話題由中國政情、至網絡熱話、旅遊、生活、閱讀,讓聽眾輕輕鬆鬆,每天對祖國知多一點點。

常設環節

星期一:最緊要識法、領導點點菜

星期二:對談中國

星期三:中國討論區;同聲同氣談天說地

星期四:點點評論;閱讀中國

星期五:漫遊中國;閒話粵語

專題分類:中國熱話
發表評論

最新專題