【十萬八千里】美國華盛頓州現「大虎頭蜂」
2020-05-10

如果你平時見到蜜蜂,都會左閃右避;咁遇上最近在美國華盛頓州出現的「大虎頭蜂」,一定會更加恐慌。

「大虎頭蜂」原本生於東南亞、中國大陸南方以及台灣;上年12月首次喺美國被發現,現時數量數以百計。科學家估計,佢地有可能係經由國際貨運「偷渡」至華盛頓州港口,亦有可能係有人刻意咁做。



「大虎頭蜂」有個呈橙黃色嘅大頭,腹部有黑色和黃色嘅條紋。佢地身長可達6.4厘米,相當於成年人食指咁長;毒刺長6亳米,養蜂人常著嘅防護裝備亦可輕易刺穿,更加有「亞洲殺人蜂」之稱。

一般蜜蜂傷人一次之後,自己亦會隨之而死亡;但「大虎頭蜂」可以針人好多次,加上佢地體型大,可以釋出大劑量毒性強烈嘅毒液,令傷口周圍局部壞死;如果多次被刺中,壞死嘅細胞同毒液更會進入血液、影響器官甚至致命。喺日本,全國平均每年有30至50人因而死亡。

不過喺一般無受威脅嘅情況下,「大虎頭蜂」並唔會攻擊人類;佢地最大嘅目標係蜜蜂。《國家地理雜誌》指出,一小群「大虎頭蜂」,就可以喺90分鐘內,佔據原有數千隻蜜蜂的蜂巢,之後更會將幼蜂嘅身體咬爛做富有營養嘅糊狀物,喂飼自己嘅幼蟲。

蜜蜂被大舉纖滅,會嚴重危害農業和生態平衡。國際養蜂業聯會指出,全球大約三分一食物需要靠蜜蜂授粉生產;按美國農業部估計,單喺美國,蜜蜂授粉生產嘅作物總值更高達150億美元。由於美國本土蜜蜂數量不足,所以每年都要由澳洲、新西蘭、墨西哥等地進口大量蜜蜂授粉,疫情下大量航班取消,進口量已經大受影響;「大虎頭蜂」出現並屠殺美國蜜蜂,可謂雪上加霜。

華盛頓州農業部目前已著手設計數百個陷阱,期望可以捉拿「大虎頭蜂」嘅蜂后同工蜂,阻止佢地交配並佔據更多地域。昆蟲學家指出,如果幾年內唔能夠令「大虎頭蜂」喺美國絕跡,佢地的足跡將遍佈全國。


【十萬八千里】

主持:陸宇光、譚永暉、高福慧
編導:高福慧
監製:陸宇光

【十萬八千里】六十分鐘陪你走遍世界
逢星期六上午11時至中午12時FM92.6香港電台第一台

專題分類:國際追蹤
發表評論

最新專題