【中國點點點──新聞焦點】《中國點點點》帶你「走進十八大」
2012-09-24

《中國點點點》環節 - 「走進十八大」
撰稿/主持: 呂秉權

 第一集 (播出日期: 2012-09-17)
主題: 點睇十八大



看中共十八大,應如何入手?

中共十八大即將召開,呢個環節將會每星期,為大家分析同介紹,十八大的最新形勢,同中國政壇的熱話,等聽眾可以第一時間掌握內地政局的最新發展情況。

呢集,我哋先一齊探討下,睇中共十八大,應該點樣入手?

先問一問,乜嘢係中共十八大呢?
中共十八大,喺一次中國共產黨的全國黨代表大會,喺嚟緊中國政壇的一個頭號會議,好快喺北京舉行。十八大之所以受到全球關注 係由於會議到時將會產生,新一屆中共的最高權力核心,亦即係中共中央政治局常委,佢哋負責制定國家未來的發展路向,同為重大事情拍板。例如係,點樣處理嚴重違紀的前重慶市委書記薄熙來,就要經過中央政治局常委的表態。

現時的中央政治局常委由9人組成,佢哋分別係
排第一的中共總書記、國家主席、中央軍委主席胡錦濤
排第二的,是全國人大委員長吳邦國
排第三的,是國務院總理溫家寶
排第四的,是全國政協主席賈慶林
排第五的,係主管意識形態的李長春
排第六的,係主管港澳事務的國家副主席、中央軍委副主席習近平
排第七的,係常務副總理李克強
排第八的,係中紀委書記賀國強
排第九的,係中央政法書記周永康

以上9個人,除咗有機會問鼎國家主席同總理的,習近平同李克強將會留任之外,其餘七人都因為年齡問題,將會全部退下。所以,全球都注視新一屆的中央政治局常委究竟會由幾多人組成,會由乜嘢人組成,分別代表乜嘢的派系,例如係一般所講的太子黨、江派同團派等等,而佢哋對於改革,特別係政治體制改革的取態同決心會係點樣,究竟係屬於改革派、定保守派?

對涉及既得利益集團同老百姓利益的政策,新的常委又有無動力或膽色去向自己人開刀、而站喺老百姓的一方呢?而常委當中的各個派系會唔會因為互相制衡同鬥爭而要更長時間磨合呢?

擁有超過8千萬黨員的中國共產黨係全球最大的政黨今次中共最高權力核心的交接,係中共十年嚟最重要,同最大規模的人事變動,將最少影響今後十年的中國政局

而呢次的交接,亦意味住胡溫十年執政即將告一段落,習近平、李克強體制將掀起新的一頁,中國將正式進入以50後為首的,中共第五代領導人的新時代。

觀望中共十八大,各位聽眾朋友可以留意以下的事態發展,第一, 就係大熱總書記人選習近平的健康情況,究竟佢又會用乜方法,進一步向各界展示佢健康無恙,大局在握呢?

另外,習近平又喺十八大前會見改革派人物前中共總書記胡耀邦之子胡德平,呢位有聲望但靠邊站的另類太子黨,胡德平近年多次同改革派,以及一眾失意的中共領導人後代喺北京低調召開有關改革的研討會,我本人亦曾經列席其中,見證胡德平對政治體制改革的堅持,但呢啲研究會都係喺監控、同有啲驚弓之鳥的氣氛下,十分低調咁進行,當局亦限令官方傳媒不得對此進行報道,今次太子黨之首的習近平,對失意但主催改革的中共領導人後代靠攏,並據報說出「中國累積的問題前所未見。」
「我們必須想辦法進步和改變,同時保持穩定。」「共產黨必須以新的活力實行改革,以防出現社會和經濟問題。」

到底習近平真係有改革的決心同能力,定係姿態重於實際呢,大家可以放長線觀察。

第二,大家亦要密切留意,中央軍委主席胡錦濤,除咗總書記、國家主席一職之下,會唔會連中央軍委主席一職都退埋落嚟,即外界所講的裸退、全退,完全退下權力崗位,胡錦濤定係會仿傚江澤民的做法,留任中央軍委主席兩年,如果真係咁做,胡錦濤又會對習近平為首的領導,帶嚟乜嘢影響呢

而呢一種留任軍委的做法,又會唔會成為日後中共高層權力交接的一個慣例呢?

第三,習近平接班後,佢的頭上將有兩個前任領導人,即外界所講的「太上皇」,同「太太上皇」,即係江澤民同胡錦濤,係歷來少的見的,佢哋會唔會退而不休? 而佢哋的影響力,又會唔會削弱習近平的領導權威呢?

習近平要點先唔會左右做人難呢?

下星期的同樣環節,我哋將會同大家深入探討,新的政治局常委人數,如果由9人改為7人,究竟會對中國政局帶嚟乜影響?

= = = = = = = = = = = = = = = = = = = = = = = = = = = = = = = = = = = = = = = = = = = =

第二集 (播出日期: 2012-09-24)
主題: 中央政治局常委的人數



中國十三億人口,佢哋的命運某程度上係主宰喺九個50幾至70零歲的人的手入面,呢九個人,就係中國的最高權力核心 ─「中共中央政治局常委」。

佢哋的決策影響住中國的政局、經濟發展同外交方針。嚟緊的中共十八大,政治局常委的人數,好大機會由9個人縮減至7個人。到底,政治局常委人數的多寡會對中國政局來嚟乜影響呢?而常委之間的工作分工又會有乜變化呢?

有分析認為,新常委的人數如果由九人減為七人,新班子的權力將會更集中,決策可能更有效率。

喺江澤民時期,92同97年的十四大同十五大,當時的中央政治局常委就係7個人,到胡錦濤時代的十年,常委人數就加到9個。

如果真係要喺目前的9個常委入面減兩個人,到底,應該減邊兩個呢

目前,九個中央政治局常委的按排名,佢哋的職位或主管的範疇分別係:
總書記、國家主席同中央軍委主席
全國人大總理
全國政協
主管意識形態同文宣 國家副主席
常務副總理
中央紀律檢查委員會
同中央政法委

十八大常委人數改革,傳出的其中一個版本係,9人入面,將會減去主管意識形態的常委,同中央政法委書記兩個人。佢哋所主管的範疇,正正係近年最為人詬病的。

首先講講主管意識形態同文宣的常委。

主管意識形態的常委,負責限制傳媒同言論自由,特別針對互聯絡的資訊流通,有關常委直接管轄中宣部、文化部、國家廣電總局、新聞出版總署等部門。佢哋高壓的意識形態監控,令Google退出中國;另外,當局又遏制大大小小新聞事件,例如溫州動車事故同北京水災的報道,咁做唔單止令內地媒體同民眾反彈,甚至影響埋中國的國際的形象。


有評論認為,將主管意識形態的常委降格,可以展示新領導層的開明形象同改革決心,同時亦避免一個常委,可以主管晒意識形態的操控大權。

第二個被減去的常委,可能係常委中排名最後的中央政法委書記,政法委書記,負責公安、國安、法院同檢察,亦即係內地維穩的一把手,實權相當大。

眾所周知,近年即使維穩費超越軍費,但社會的情況越維越不穩,群體事件由十年前的幾萬宗,發展到近年的十幾萬宗,從廣東烏坎、四川什堃到江蘇啟東,民怨喺打壓中不斷升溫,示威每每變成無政府狀態的騷亂。

實驗證明,打壓式維穩,並非國家長治久安之道,到底中央政法委書記,應該點樣改革,我哋下一次的節目,會為大家詳細探討。

最後,同大家睇番歷史,中央政治局常委的人數,黨章並無明確界定,只係按不同的形勢而增減,常委最多時係66年八屆十一中全會,因為文革的形勢,常委加到11人,最少常委的時期係76年文革後,四人幫被打倒,加上毛澤東等領導人逝世,十屆常委只喺得番葉劍英一個。

但無論政治局常委人數點改,數目一定係單數,唔會再出現好似毛澤東年代咁,常委數目係雙數的呢啲咁荒唐局面,因為單數的投票決策先會有結果,唔會出現和局,你眼望我眼。

好啦,今次講住咁多先,下星期再同大家走進十八大。

= = = = = = = = = = = = = = = = = = = = = = = = = = = = = = = = = = = = = = = = = = = =

第三集 (播出日期: 2012-10-01)
主題: 中央政法委書記如何改革?



內地近年「維穩」至上,「穩定壓倒一切」繼續當道,但社會的民怨、人權同維權事件爆完又爆、仲越嚟越爆。另外,又發生轟動中外的王立軍事件,令中共高層非常尷尬,喺呢個大背景之下,嚟緊「十八大」中央政治局常委的人數盛傳由九人減為七人,被降格同開刀」的好大機會係經常開民眾「開刀」的中央政法委書記。假若,中央政法委書記嚟緊真係不能「入常」,做唔到中央政治局常委,咁到底呢個職位將如何改革呢?佢對中國的法治,又有乜深遠的影響呢?

中央政法委,全名係中共中央政法委員會,負責統領全國的「公、檢、法」,即係公安、國安、法院、檢察同司法系統,可以話係軍方之外,中國擁有最大實權的機構。

政法委的職能就好似中國古時的衙門咁,負責管治嗰個係佢,拉人封艇嗰個又係佢,連升堂問審判你死刑、嗌狗頭鍘侍候嗰個都係佢。
今時今日的政法委,可以指揮公安拉人,命令檢察院辦案批捕,操控法院判決結果,掌握晒當事人的生殺大權,中央政法委的權力,甚至凌駕埋最高人民法院,同最高人民檢察院。中央政法委權力膨脹,運作幾乎不受約束,可以話係「依法治國」體制下的一個特權怪胎。

當年,重慶「打黑除惡」,由薄熙來指揮,地方政法委督辦所開的「大三長」會議,就係一個荒唐的例子。當時重慶的公安局長、檢察院長同法院院長坐埋一齊喂喂喂,一條龍辦案,處理打黑案件,按照政法委的精神話某某人有罪就有罪,檔案文件就由公安交檢察,檢察交法院,大家輪流簽字,三位公、檢、法的一哥,三權合作,互相幫助,連部門之間分開辦工、程序獨立的門面功夫都不顧,被內地法學界人士猛烈批評。

目前,中央政法委書記周永康,仲身兼兩個維穩單位的主管,包括中央維穩工作領導小組的組長,以及中央社會管理綜合治理委員會的主任,喺佢任內,中國進入咗高壓維穩新時代。先從維穩費方面講,2010年起維穩費開始超越軍費,三年時間三步走,分別突破5千億、6千億同7千億,今年的維穩預算仲創新高,達到7018億元,比去年增加近百分之14,超過軍費增幅近三個百分點。而比整體軍費,亦多出近百分之五。

中央政法委雖然掌握實權同金權,要錢有錢,要權有權,但內地局面越維越不穩,接連發生中外關注的人權同各類大事,包括:王立軍事件、李旺陽事件、陳光誠事件、艾未未事件等等。另外,各地大大小小的群體事件亦無日無之,仲每每演變為無政府狀態的騷亂,計有啱啱7月尾,江蘇啟東萬人抗議污染的騷亂,大批群眾佔領市委大樓,從高處將政府文件好似飄雪咁掉落街,仲幫市委書記剝光豬;而去年發生的廣東烏坎事件,人民因為反貪腐,逼上梁山,最終推番村委領導,同汕尾市政法委書記,呢啲亂局都係當局高壓維穩的惡性結果。

咁到底,未來中央政法委書記,應該點改革呢?目前傳出的其中一個版本係,新的中央政法委書記,將會由目前的政治局常委級別,降級為20多名政治局成員之一,並向排名第二的政治局常委,全國人大委員長負責報告,以體現依法治國的精神。

而事實上,喺胡錦濤時代之前,中央政法委書記的級別,亦只係中央政治局委員,即使第一任中央政法委書記、好有地位的中共元老彭真,亦只係普通政治局成員一名,就算六四事件後,政法委書記職能升級,亦無將呢個職位,變成政治局常委的當然成員,而家只係打回原形,還原基本步,但一晃十年,重回起點。究竟中國的政法改革,係進步定係倒退呢?

雖然中央政法委書記可能改革,但地方政法委書記,反而有坐大的情況,近十個地方的政法委書記由省副書記兼任,包括北京、廣東、湖北、內蒙等等,顯示中央雖然改革,但地方仍要維穩。

最後,我想引用鄧小平同喬石的講話,為今次討論作結。鄧小平1986年喺一次中央政治局常委會議上講過,「黨要管黨內紀律的問題,法律範圍的問題應該由國家和政府管。
黨干預太多,不利於在全體人民中樹立法制觀念。」而前人大委員長喬石,94年喺貴州考察時就強調,「黨也要在法律規定的範圍內活動。共產黨領導制定的法律,黨不遵守誰遵守?你如果不把法律當一回事,還能叫老百姓遵守法律嗎?”」
依法治國,真係長路漫漫。好啦,今集我哋講住咁多先,下星期我會同大家採討,十八大的黨內民主問題,多謝收聽,再會。

= = = = = = = = = = = = = = = = = = = = = = = = = = = = = = = = = = = = = = = = = = = =

第四集 (播出日期: 2012-10-08)
主題: 黨內民主



喺薄熙來事件,同黨內派系激烈鬥爭的種種傳聞之下,舉世矚目的中共十八大,會期終於確定喺嚟緊11月8日召開,遲過各界同全國政協副主席董建華的預期。

一般預料,新一屆中央政治局常委,最快將會喺11月15日十八屆一中會之後,由習近平率領,首次同中外傳媒會面。到底,呢啲中共最高領導人,係點樣產生的呢?由8000萬黨員,拾級而上,連跳五級上到中央政治局常委,係點體現黨內民主的呢? 而十八大的黨內民主,究竟係進步定倒退呢?

先同大家講講,十八大的中央領導人係點產生的,中央最高領導人的基礎嚟自8000萬黨員,逐級咁上分別係2270個黨代表,200多人的中央委員,約25人的政治局委員,而最頂層就係約7人的中央政治局常委呢個最高權力核心,到底呢個權力金字塔係點選出嚟的呢?

目前中共有8000萬黨員,在包括31個省市自治區、香港、解放軍、 中央機關等,40個選舉單位,
按照多於百分之15的選舉差額.選出咗合共2270十八大代表.呢個層次、同選舉差額的百分比.已經係黨內民主最大化的體現.被中共攞嚟宣傳黨內民主的進步。不過,睇返五年前「十七大」的表述,話選舉差額「不少於15%」,十八大就話,選舉差額「應多於15%」,一個「不少於」,一個「應多於」,就好似我而家話,我會借唔少過100蚊比你,五年後我發咗達,好慷慨咁話,我會借多過100蚊過你,表面豪氣,實質搵笨,究竟咁樣係大恩大德,定係小恩小惠,大家自行判斷。

但無論如何,「不少於15%」的差額選舉,同「應多於15%」的差額選舉,充分體現咗中共修辭學的精妙,但唔少地方的選舉單位,不為修辭所困,做得相當爭氣,好似廣東同江蘇咁,選舉差額的比例仲超過百分之20添,不過,首次獨立成為選舉單位的香港工委,究竟差額係幾多,有乜人落選,仲係秘密,相信只有天知,地知,港人不得而知。

喺產生咗2270人的十八大代表之後,佢哋將會透過差額選舉,選出200多人的中央委員,同160人以上的候補中央委員,在中共十六大時,中央委員候選人有208人,席位有198個,差額10人,差額比例百分之5.1。十六大,中央候補委員候選人有167人,席位158個,差額9人,差額比係百分之5.7。到中共十七大,獲提名的中央委員人選有221人,應選204人,差額17人,差額比例8.3%,而候補中央委員獲提名的有183人,實選167位,差額16人,差額比例係百分之9.6%。換言之,今屆十八大的中央委員,同候補中央委員,將會分別按照最少百分之8.3同9.6的選舉差額產生。

呢度我想說明一點的係,中央委員當選後,只會按照姓氏排名,唔會公布票數,而候補中央委員,就會按照得票多寡嚟排名,大家可以從中窺探候補中央委員,當時喺黨內的支持度或聲望如何,好似97年,中共十五大,時任福建省委副書記的習近平,喺151人的中央候補委員當中,排行包尾,差啲被差落嚟,而時任廣東省委常委,目前甚有聲望的副總理王岐山,中共十五大時,亦喺候補中央委員中排行尾六。睇習近平同王岐山的今時今日,再對比佢哋十五年前的遭遇,可以得出一個結論,就係英雄莫問出處。
睇番歷史,中共首次喺中央委員層次,引入差額選舉,係87年的中共十三大,當年,已經貴為十二屆中央委員的左王鄧力群,居然喺差額選舉被差咗出嚟,令人大感意外。未知今屆十八大,喺各界激烈緊箍票下,究竟會有乜人意外墮馬呢,大家拭目以待。

差額選出200多人的中央委員之後,黨內民主其實已經行人止步,因為繼續再上的20多人中央政治局委員,同大約7人的中央政治局常委,按照慣例,全部都會以等額選舉產生,即係十個候選人,十個席位,人人有分,永不落空,體現黨內的和諧共融。

對比我哋的鄰國越南,越南共產黨早喺六年前,已經差額選舉黨總書記,而佢哋的中央委員差額比例,更加係中共的三倍,中國的經濟規模,係越南的400幾倍,無理由喺政治方面,任由越共坐大,拋離中共的黨內民主進程,睇嚟中共的黨內民主,真係要急起直追先得嘞。

發展黨內民主,近年成為中共越嚟越積極的語言表述,十六大報告首次提出,黨內民主是黨的生命,十七大報告進一步強調,尊重黨員主體地位,以擴大黨內民主帶動人民民主。中共總書記胡錦濤7月23日喺全國省部級主要領導幹部專題研討班上的講話,更提出要發展依法的民主政治,同時建設民主的法治國家,在黨的領導下,使人民擁有比現在更多的民主權利。胡主席,講得好,人民更希望你做得到。

好啦,今集就同大家講到呢到,下星期,我會同大家探討,胡錦濤假若留任中央軍委主席,會對中國政局,帶嚟乜的影響。

= = = = = = = = = = = = = = = = = = = = = = = = = = = = = = = = = = = = = = = = = = = =

第五集 (播出日期: 2012-10-15)
主題: 中央軍委主席

 


中共建政63年,只有最近呢十年的權力交接,先稱得上係平穩咁進行。毛澤東年代不斷更換接班人
鄧小平時期又先後廢黜咗兩名總書記胡耀邦同趙紫陽,造成好大的政治震盪同社會影響。直到02年的十六大,中共先頭一次出現「平穩」的權力交接,江澤民向胡錦濤交出權力。而嚟緊第二次「平穩」的權力交接,將會喺下個月的十八大進行。不過,今次各界都感受到,中共內部各派系的權力鬥爭,相當激烈,氣氛亦唔係咁尋常,呢頭傳出可能召開第二次北戴河會議,嗰頭又話常委名單又有新版本,而多名前任領導人,更不甘寂寞,隔空較量。

9月底,江澤民、曾慶紅、李嵐清喺國家大劇院強勢亮相;10月初,久未露面、被指同江澤民意見相左的前政協主席李瑞環竟然喺現任北京市委書記,胡錦濤愛將「郭金龍」的陪同下,公開觀賞網球賽。呢啲歌聲魅影同球來球往的情境,正好折射出中共當前的鬥爭氣氛同政局的撲朔迷離。

今集,我會同大家重點討論「十八大」入面最重要的一個席位究竟誰屬?呢個席位就係「中央軍委主席」。到底,胡錦濤會唔會繼續執掌軍權再坐一會呢?如果佢咁做,究竟會對中國政局帶嚟乜的影響?

先講吓歷史,大家都好熟識毛澤東的一句名言「槍桿子裏出政權」。1927年毛澤東提出呢句說話時
強調軍隊對黨係極端重要的,所以毛澤東喺遵義會議,確立佢喺黨內地位之後一年,好快掌握埋軍權
毛澤東先至全面掌權,無人能夠威脅佢的地位。

中共多年嚟都強調「黨指揮槍」,但實情係「槍指揮黨」先至啱,因為根據中共的慣例,中央軍委主席係中共領導層入面,擁有最終決定權的人,可以凌駕埋黨的總書記,最明顯的例子就係鄧小平
87年中共十三大之後,鄧小平唔再做政治局常委,但就以普通黨員的身份,繼續擔任中央軍委主席
八九民運期間,雖然總書記趙紫陽反對,但佢仍然可以調兵入城,對於軍委主席,江澤民曾經有過咁的論述,佢話:「黨的總書記、國家主席、軍委主席,三位一體這樣的領導體制和領導形式,對我們這樣一個大黨、大國來說,不僅是必要的,而且是最妥當的辦法。」江澤民的講法即係話,只有做埋中央軍委主席,總書記先至有真正的話事權。

中共對於中央軍委主席的換屆,並無明確的規定同模式,而按照胡錦濤前兩任的做法,鄧小平同江澤民都係延遲交出軍權的。87年十三大趙紫陽做總書記時,鄧小平繼握軍權,「89六四」後,江澤民任總書記,五個月後,喺十三屆五中全會上,鄧小平將中央軍委主席一職交比江澤民,一齊聽番當時的情況。

「一句話,感謝同志們的理解和支持,全會接受了我退休的請求。衷心的感謝全會,衷心地感謝同志們」

到江澤民時代,佢喺總書記一職坐咗13年,但中央軍委同國家軍委主席一職,就做足15、16年
即係話胡錦濤02年尾接任總書記,但05年3月,先全面接掌埋軍權,期間,江澤民留任軍委兩年幾。

當年,江澤民喺一封寫比中央政治局的信件入面解釋咗,留任軍委主席一職的理由,江澤民話,佢主要係考慮到嗰陣的國際形勢複雜多變,國防和軍隊建設任務很重,所以從大局出發,決定留任黨和國家的軍委主席職務,而此後,佢話自己盡心盡力咁,履行中央交托的職責,始終尊重和支持中央領導集體的工作,而家一齊重溫吓,04年9月江澤民喺十六屆四中全會上向胡錦濤交出軍權的一刻。

「今天來同大家見面,我感覺到非常高興。講三句話:第一,衷心感謝接受我的辭呈。第二,衷心感謝這麼多年來同志們對我工作的支持和幫助。第三,希望大家在以胡錦濤同志黨中央領導下,努力工作,繼續前進。我堅信,我們黨的事業必定會不斷地取得更大的勝利!」

嚟緊十八大,中外相當關注胡錦濤,會否參照鄧小平同江澤民的做法,留任兩年中央軍委主席呢?
按照全國政協副主席董建華的講法,胡錦濤將會按照慣例,留任中央軍委主席一職,如果真係咁樣
咁呢種交接模式,將成為中共未來權力交接的指定動作,十年後習近平,亦預料會蕭規曹隨。

胡錦濤假若留任中央軍委到底會對中國政局帶嚟乜影響呢?有分析認為,影響可以分好同壞兩方面。先講好的方面,有評論認為如果胡錦濤留任軍委主席,咁習近平將可以集中精力,帶領新班子,處理國內同國際問際,無需分心處理軍方事務;另一個講法就係,由於目前釣魚台、南海同美國重返亞洲等因素,令區內的軍事氣氛變得緊張,由有經驗的胡錦濤繼掌軍權,將有助解放軍的應對同穩定,不過,胡錦濤如果繼續做軍委主席,亦有一定的壞處,最明顯就係會削弱習近平的權威,令新班子的管治事倍功半,試想像,未來一段時間,每逢軍方的接見活動,做咗總書記,但只做軍委二哥的習近平,都要跟住胡錦濤後面拍手,黨政軍高層看在眼裏,會點樣諗習近平?情形就好似當年,胡錦濤執掌黨務但未有軍權時,要跟住江澤民後面拍手一樣,第二個唔好處,就係胡錦濤會比人戀棧權力的印象,另外,佢亦會將呢種,為人詬病的軍權交接方式,變成未來每次大換班的指定動作。

自從薄熙來事件發生後,解放軍報、多個軍區同兵種,都發表文章,話要堅決聽從胡主席的指揮,未知,呢啲效忠,對胡錦濤留任軍委一職有乜啟示呢?

好嘞,今個星期我哋講住咁多先,下星期我會大家探討,十八大首次獨立成團的「香港工委」,多謝收聽,再會。

= = = = = = = = = = = = = = = = = = = = = = = = = = = = = = = = = = = = = = = = = = = =

第六集 (播出日期: 2012-10-22)
主題: 香港工委

 


中共十八大,簡稱「香港工委」的香港工作委員會,首次獨立成為其中一個選舉單位,意味住呢個喺香港「負責中共黨員同地下黨員」的黨組織,正式浮上水面。到底,香港工委係由乜人組成呢,而佢的產生同運作又係咪公開、透明呢?究竟喺香港,又有幾多中共黨員到地下黨員呢?

先講吓香港工委的產生。今屆十八大,全國共選出咗2270個黨代表,佢哋係由全國40個選舉單位選出的。呢啲選舉單位,包括31個省市自治區、港、澳兩個特區、解放軍及武警部隊、中央國家機關、中央金融系統等等。各個選舉單位,會按多於百分之十五的選舉差額,選出代表。舉個例,假設某個團有100個當選名額,咁候選人將會有115個,15人將被淘汰,以體現百分之十五的選舉差額。

之後,每個選舉單位,幾乎都公布咗當選人數同名單,例如係最大的團,解放軍同武警部隊咁,就詳細列出咗300人的當選名單,人員包括各大軍區、兵種的政委同司令員等,至於北京,就有64人成為十八大代表,佢哋包括賈慶林、劉淇、郭金龍等等。

不過,首次獨立成為選舉單位的香港工委同澳門工委,特事特辦,並無好似其他地方咁,公布當選的具體名單,甚至連幾多人當選都無公布。傳媒係要從云云2270人的全體名單中,大海撈針咁逐個捉,睇吓邊啲人名熟口熟面,疑似同香港有關,之後就逐一核對,先至能整理出較似樣的香港工委十八大代表名單。

除咗人名要估,香港工委的當選人數都要估,各界係透過,將全國的十八大代表當選人數,減去已公布的各個團的人數,就得出無公布代表人數的,香港、澳門同台聯的實際數字,綜合各界的分析同計算,香港工委十八大代表,大約有十五人,到底,佢哋係乜人呢?

大約十五人的香港工委十八大代表,中聯辦包攬咗其中六人,佢哋係中聯辦主任、香港工委書記彭清華,四名副主任,分別係十七大當選為中央紀委委員的李剛,負責經貿的郭莉,分別主管人事同青年工作的黃蘭發同王志民,另外仲有中聯辦宣傳文體部部長郝鐵川,商界方面,就有中資駐港幾大企業
包括中旅、中銀香港、華潤、招商局等負責人,除此之外,其餘香港工委的十八大代表,究竟係乜人,外界仍然進行緊地氈式搜索。

已知的香港工委十八大代表,全部都係中央派駐香港的黨員,香港本土黨員仍未曝光,據了解,未浮出水面的香港工委代表,仲包括工會人士,同土生土長的香港人,但由於香港工委屬地下黨的性質,呢啲人的姓名就無從得知。

其實,香港人做黨代表,並唔係第一次,87年的十三大,內地官方媒體唔小心曝光咗《基本法》諮詢委員會秘書長毛鈞年的黨代表身分,嗰個時候香港人先知道,香港有正式的地上黨員,但可惜,之後的二十五年,就再冇香港人黨代表曝光了。不過,巧妙的係特首梁振英後來就做咗《基本法》諮詢委員會秘書長。

到底香港有幾多中共黨員呢?江關生先生喺佢的著作《中共在香港》中,引述前新華社社長許家屯的數字話,1983年的時候,港澳大約有3000個本土的黨員,時至今日,江關生估計,香港大約有3萬多地下黨員,但任由傳媒對疑似黨員查問身分,即使真係黨員的人,基於各種原因,亦不敢公開身分,管理祖國的執政黨,幾時先會喺香港地面運作呢?

中聯辦研究部部長曹二寶喺佢成名作香港第二支管治團隊理論中,講到治港力量入面,一支係「特區的建制隊伍」,第二支就係「中央、內地從事香港工作的幹部隊伍」,港澳工委就係第二支治港力量的中堅,近年港人經常批評西環治港,而中聯辦副主任的人數,亦增加到歷來九人的新高,而梁振英喺當選特首的翌日,隨即拜會中聯辦主任彭清華,到底彭清華當時係以香港工委書記的身分,同梁振英會面,定係純粹以中聯辦主任的身分,同梁振英聯絡一番呢,大家不妨好好咁諗一諗。

好啦,今集傾到呢度,下集我會同各位分享,十八大入面的太子黨,多謝收聽,再會。

= = = = = = = = = = = = = = = = = = = = = = = = = = = = = = = = = = = = = = = = = = = =

第七集 (播出日期: 2012-10-29)
主題: 太子黨

 

大家成日話:「一朝天子一朝臣」, 但喺中國政壇, 自從毛澤東、鄧小平的強人時代過去之後, 「一朝天子未必可以有一朝臣」。因為每位新任的總書記, 總要面對黨內元老, 同各個派系安插人馬。好似胡錦濤咁, 做咗十年, 但9名政治局常委當中, 仍然有2/3係江澤民的親信。

嚟緊「十八大」, 即將迎來「習近平時代」, 到底「習近平」呢朝天子, 能否擁有自己的一朝臣呢? 而以習近平為首的「太子黨」治國, 究竟又有乜利弊呢?
 
我哋先講吓太子黨治國的背景。所謂「太子黨」, 即係中共領導人的後代, 由於佢哋根正苗紅、血統純正, 只要佢哋作風正派、務實, 往往都會得到元老的支持, 當然過分高調, 大搞個人主義的薄熙來, 係失敗的例子。

文革時期, 就曾經有過「老子革命兒接班」的口號, 而家就有「父輩打江山,我們保江山」, 甚至「坐江山」之說, 關於太子黨治國, 坊間好多政論書籍同文章都引述一段相信係中共元老陳雲的講的說話, 佢話:「我們的子弟接班,至少不會反對我們」呢句說話說明咗上一代領導人係希望太子黨接棒「保江山」, 同繼承上一代的基本路線。
 
但點解陳雲會咁驚上一代被人反對呢? 一齊了解吓中國的財富同經濟利益分配, 大家可能會搵到答案。

目前,中國擁有1億本土財產的人入面, 超過九成係高幹子弟, 西南財經大學經濟與管理學院, 今年9月的一項調查就發現, 中國最富有的頭百分之十的家庭, 控制咗全國8成半的財富, 比美國仲要高兩成半, 我相信最有錢的呢啲中國家族十居其九都係權貴高層。

紐約時報同華爾街日報今年五月同舊年年底, 分別詳細報道咗中國太子黨同高幹子弟如何身居要職, 同坐擁幾多資產, , 由毛澤東、劉少奇、習仲勛、薄一波的後人, 講到鄧小平、楊尚昆的子弟, 由江澤民、李鵬、朱鎔基的後代, 數到胡錦濤、溫家寶、吳邦國的家庭, 當然最後亦講埋習近平同薄熙來的家族, 呢啲領導人的家族, 分別掌控咗國防、金融、電訊、科技、核能、電力、基金投資等各個王國。
 
以李鵬為例, 佢的女李小琳, 係中國電力國際的掌舵人, 佢個仔李小鵬係發電能源大省山西省的副省長, 記得今年喺全國兩會, 撞到李小琳, 佢話自己並唔係靠父蔭, 而係全憑自己的實力, 當上電力王國一姐。另外,薄熙來如果唔係出事, 都唔會被揭發擁有數十億元的資產。

呢啲例子正好說明, 以高幹子弟同太子黨為首的權貴利益集團, 就係中國黨、政、軍同經濟領域入面, 掌握最多資源, 同最有影響力的群體。有分析認為, 呢啲利益集團, 正係中國改革的最大阻力。
 
當前, 習近平要應付複雜的國內形勢, 包括要面對作為既得利益者的高幹子弟, 拒絕改革同監管的力量, 以及來自民間反對特權、貪腐, 同「貧者越貧,富者越富」的呼聲。

59歲、太子黨出身的習近平, 手掌係肉, 又背又係肉, 究竟佢會點將利益重新分配, 還富於民呢?佢要改革, 又點樣可以唔得失一眾高幹子弟呢?呢個相信將係全世界最難完成的任務。

中共的太子黨, 除咗當權、當道同大富大貴的之外, 仲有一批係失意、靠邊站的。已故中共總書記胡耀邦的仔胡德平就係其中之一。當毛澤東個孫, 中國最年輕的少將毛新宇都當選十八大代表時, 主催政改的胡德平, 就從未做過黨代表。
 
習近平為咗, 廣納太子黨內不同聲音, 喺背傷前曾經專門同胡德平見面。報道話習近平表示, 必須高舉包括政改的改革大旗, 又話人民已對空談感到不耐煩, 但同時,習近平又強調, 要穩中求變、求進步。有評論就指, 咁樣意味住, 會變的空間的步伐並唔會太大, 一切會以穩字為先。

睇番而家的政治局委員24人入面, 太子黨或同太子黨有關的人有6個, 佔咗四分一, 當中包括習近平、王岐山、俞正聲、李源潮等等。

嚟緊十八大的七人政治局常委, 太子黨的比例, 一定會比目前的1/9有所增加。
 
至於習近平能否一朝天子擁有自己的一朝臣, 唔少中國問題專家認為, 十八大的中央政治局人選, 仍然好大程度會受到包括江澤民、胡錦濤等各個派系的左右, 習近平仍未強勢到, 可以主導自己班子的組成。

習近平真正時代的來臨, 預計要等到五年後的「十九大」, 當「十八大」年老的常委都退落嚟之後, 習近平先能夠較隨心所欲咁, 安插自己的人馬。

但睇番最近, 解放軍四大總部的人事變動, 總參謀部, 總政治部, 總裝備部, 同總後勤部的四名新任首長, 四人入面最少有兩人同習近平關係密切。其中, 總裝備部部長張又俠上將, 外界形容佢係太子軍, 因為佢父親開國上將張宗遜, 同習近平父親習仲勛係戰友, 兩人40年代分別擔任過「陝甘寧野戰集團軍」的司令員同政委。另外, 新任總後勤部部長的趙克石, 喺習近平任職福建時就擔任駐廈門的31集團軍的參謀長同軍長, 長達十年, 有報道話, 佢同習近平關係良好。
 
雖然牌面上, 解放軍四大總部的人事安排上, 習近平手握兩席, 但四大總部之中, 實權最大, 負責軍隊作戰同管理的總參謀部, 點都係由被指係胡錦濤親信的房峰輝掌舵。另外,呢四大總部的首長, 當年升任上將, 全部亦係由胡錦濤提拔, 所以,習近平最終能否喺十多名中央軍委的人事安排上佔有優勢, 仍然有待觀察。

但無可否認, 習近平同軍中的太子黨甚有淵源, 因為佢七十年代末, 八十年代初, 清華大學一畢業的一份工, 就係到中央軍委辦公廳工作, 做當時的國防部長耿飈的秘書, 呢段歷史令佢同好多有背景或者基層冒起的軍中明日之星識於微時, 奠定佢喺軍中的地位。呢點亦可以解釋到, 點解習近平只係做咗兩年中央軍委副主席, 已經可以樹立到今日喺軍中同黨內的聲望。當年胡錦濤要做足五年軍委副主席, 好辛苦先經營到個人威信, 習近平呢方面的起步, 的確比胡錦濤當年有優勢。
 
講到太子黨治國的利弊, 有利的地方就係太子黨係掌握最多利益的一群, 能夠擺平佢哋的, 可能亦只有太子黨本身, 但弊處就係, 要太子黨向太子黨割肉, 站喺人民的一方, 以乎有違自身的利益。不過,很多人都認為習近平有別於一般太子黨, 佢曾經做過知青, 上山下鄉, 捱苦七年, 而佢父親習仲勛, 就受過十六年的冤獄同迫害, 種種的經歷令習近平明白到基層的民情同老百姓生活的苦楚, 外界因而對佢寄予厚望。

下星期, 我會到大家分享習近平的傳奇同佢的治國理念。

= = = = = = = = = = = = = = = = = = = = = = = = = = = = = = = = = = = = = = = = = = = =

第八集 (播出日期: 2012-11-05)
主題: 習近平的傳奇與治國理念 (一)




59歲的國家副主席習近平, 即將喺10日後, 即係11月15日的「十八屆一中全會」閉幕後, 以新任中共總書記的身分, 率領一眾新鮮出爐的中央政治局常委同中外傳媒見面。

全世界都擔定凳仔, 碌大雙眼「昅」實呢個歷史性的時刻。因為呢一刻, 將會標誌住中共第五代領導人正式接捧, 掌管中國呢個全球第二大經濟體的走向, 以習近平同李克強為首的「習李體制」終於來臨。

各界正觀望習近平未來的治國路線同風格, 從佢以往的一啲講話, 大家可能會得到一啲啟示。包括佢09年訪問墨西哥時, 以強硬的措詞指摘外國經常針對中國 ......
「有些吃飽了沒事幹的外國人,對我們的事情指手劃腳。中國一不輸出革命,二不輸出饑餓和貧困,三不去折騰你們,還有甚麼好說的。」

另外, 習近平今年年初訪美時, 就中國人權問題的表態, 亦令人記憶猶新 ......
「我強調改革開放30多年來, 中國人權事業取得了有目共睹的巨大成就,但在人權問題上, 沒有最好只有更好。」

到底身為太子黨的習近平, 有乜治國理念呢?

而佢的家庭背景、知青歲月、地方、沿海以至中央經驗,究竟會點樣影響呢位至少掌管中國未來十年命運的中共話事人呢?我哋先從習近平的父親開國元勛習仲勛講起。

香港人成日話「虎父無犬子」, 內地人就話「老子英雄兒好漢」, 習仲勛喺內地德高望重, 有姿勢, 有實際, 好多人都主觀期望 ,習近平能夠繼承習仲勛的風骨同優點。

習仲勛1913年出生於農民家庭, 先後坐過國民黨同共產黨的牢獄。30、40年代佢出任「陝甘邊」軍委書記, 遊擊隊同西北軍區政委, 中共建政後, 習仲勛係周恩來的主要助手, 之後歷任國務院副總理、廣東省委第一書記、人大副委員長、中央書記處常務書記等職務。

60年代天降橫禍, 習仲勛被康生誣陷, 被指支持一部小說反黨, 因而受到長達16年的關押、審查同迫害。文革結束後, 1978年,習仲勛復出喺廣東一線幫手推動改革開放, 創建了深圳同珠海經濟特區處理過偷渡潮, 之後又返番中央協助總書記胡耀邦, 主持中央書記處工作。

習仲勛最為人津津樂道的一件事, 喺佢喺胡耀邦被元老批鬥時仗義執言, 1987年,胡耀邦因為思想自由化, 同支持元老級領導人退休, 被鄧小平迫落台; 喺胡耀邦下台前, 中南海特登召開咗兩日, 批判胡耀邦的「生活會」由薄熙來父親
薄一波主持, 薄一波批評胡耀邦話「耀邦整天到處亂跑,全國二千多個縣你都快跑遍了……這不是指導工作,而是遊山逛景,嘩眾取寵。」

大批元老, 亦加入戰團,發炮批臭胡耀邦, 思想自由化, 令呢個落難的總書記, 喺中南海的懷仁堂外面大哭一場。多本記載呢段歷史的書籍都寫到, 習仲勛喺會上忍無可忍, 指住一眾左派元老, 拍枱咁話「你們這是幹甚麼,這不是重演《逼宮》這場戲嗎?這不正常,生活會上不能討論黨的總書記去留問題,這是違反黨的原則的……我堅決反對你們這種幹法!」

當時,習仲勛幾乎係唯一一個為胡耀邦講說話的人, 佢呢種將個人利益置之身度外, 正直同仗義執言的作風, 為佢喺中國老百姓同黨內, 贏得好高的評價同聲望, 一年後,佢甚至當選埋全國人大副委員長。

今日,好多人都期望習近平能夠遺傳到佢父親的正氣同風骨, 青出於藍。事實上如果講做官, 習近平已經超越晒父親, 因為習仲勛當年最高只做到中央政治局委員, 而習近平早已更上層樓, 官拜政治局常委, 甚至好快會做埋總書記。
 

= = = = = = = = = = = = = = = = = = = = = = = = = = = = = = = = = = = = = = = = = = = =
 

第九集 (播出日期: 2012-11-07)
主題: 習近平的傳奇與治國理念 (二)

 


今日,好多人都期望習近平能夠遺傳到佢父親的正氣同風骨, 青出於藍。事實上
如果講做官, 習近平已經超越晒父親, 因為習仲勛當年最高只做到中央政治局委員, 而習近平早已更上層樓, 官拜政治局常委, 甚至好快會做埋總書記。

一齊回顧番習近平, 呢位未來總書記的出身。

習近平1953年出生, 係黨內的五十後。佢的家鄉係陝西中部的「富平縣」, 「富平」,意思係富庶、太平, 以出產杮餅聞名, 而家當地就以即將誕生一位中共最高領導人而聞名於世。

習近平的媽媽叫齊心, 咁啱得咁橋, 梁振英競逐特首時亦都係以齊心為口號。當年,齊心先後誕下咗, 大女齊橋橋, 大仔習近平, 同細仔習遠平, 由於習家家風節儉, 童年時,習近平兄弟係要著姐姐著過的舊衫同花鞋, 習近平因而被同學取笑女裝男著, 於是唔肯再著呢D女裝衣飾, 父親習仲勛就話, 「染染穿是一樣的」,

對習近平影響最深的一段經歷唔係著衫, 而係佢上山下鄉「插隊」做知青的歲月。六十年代, 習仲勛被整, 十多歲的習近平就被打為「反動學生」。68年,毛澤東號召上山下鄉, 習近平終於可以避一避, 立即下定決心, 要到農村接受貧下中農再教育, 跟住就喺革命聖地延安附近的延川梁家河, 做咗七年知青。

呢七年間, 習近平捱苦捱窮, 被跳蚤咬到麻木晒, 同山區農民同食同住同工作, 鋤地、擔屎、開井、打水、修壩樣樣都做。村民形容佢身材高大,積極勞動, 唔嫌污糟唔挑食, 同民眾打成一遍。

另外,全國鬧文革停學, 知青下鄉期間, 習近平經常書不離手, 令村民留下深刻的印象。

呢段日子,習近平為咗入黨, 寫過十封入黨申請書, 但受到佢父親的影響, 第十次先至成功爭取, 習近平後來寫文章回億話, 當年的知青歲月, 帶比佢的最大收穫, 係令佢學懂乜叫實際, 乜叫實事求是, 乜嘢叫群眾, 呢啲是讓佢獲益終生的嘢, 直到依家仍然如此。

佢認定咗梁家河係佢第二故鄉, 亦因為呢段經歷, 培養出佢不變的信念, 就係要為人民做實事, 唔知習近平的呢種信念, 會否令佢未來大打民生牌, 甚至能夠從制度上, 徹底解決貧富懸殊,國富民窮, 以至老百姓得唔到公平正義的問題呢? 高牆與蛋, 佢係咪會站喺雞蛋嗰邊呢?

習近平喺文章中, 亦提起父親的家訓, 佢話父親經常同佢講, 團結的道理, 要求佢從小就做團結, 同善於團結的人。

習近平話, 佢莫論下鄉定從政, 都深深體會到, 凡是團結處理得好, 工作都能做得比較好, 如果團結處理唔好, 工作就做唔好。

喺薄熙來事件發生後, 中共各個派系鬥到四分五裂, 常委名單日日不同, 總理溫家寶又被拖埋落水, 雙方各自有對方人質在手, 敵未動,我先動, 唔知仲有幾多黑材料未爆出, 習近平黃袍加身之後, 團結大旗一舉, 元氣大傷的各派, 未知會唔會咁容易歸順, 習近平的功力, 將會備受考驗。

回想起梁振英喺當選特首後, 話香港再無梁營、唐營, 只係剩番香港營, 唔知習近平又有無度緊類似的對白呢 ?

做完七年知青, 習近平75年到清華大學讀化工4年, 一畢業就即刻到中央軍委辦公廳, 做當時的國防部長耿飈的秘書3年, 之後,主動要求下放到河北正定縣工作。

1985年起的17年, 習近平轉到沿海大省福建任職, 由廈門副市長, 做到福建省委副書記。期間,習近平收穫愛情, 迎娶咗解放軍歌唱家彭麗媛, 另外,廈門就爆出咗賴昌星案。2002至2007年, 習近平調往浙江, 做到省委書記, 期間促進咗民營經濟發展, 以及浙江同上海的融合。

07年3月, 陳良宇下台後, 習近平臨危受命, 到上海擔任市委書記, 收拾亂局, 成為廿多年來首個空降的上海市委書記。

當年,時任中組部長賀國強, 係咁樣形容習近平的, 佢話習近平政治上強, 有較高的思想政策水平, 作風深入務實,關心群衆, 處事穩重,公道正派, 善於團結人,要求自己嚴格。

事實上,習近平多年來都無乜不利傳聞, 不過,近月彭博通訊社就報道, 佢家人擁有豐厚的海外資產。

2007年,係習近平仕途極要重的一年, 因為佢喺十七大連跳兩級, 由普通的中央委員, 直接升上政治局常委, 睇番97年中共十五大時, 習近平首次選舉中央候補委員, 喺151人入面, 佢的得票排名居然排包尾, 差啲出局, 所以,英雄真係莫問出處了。

十八大,習近平即將升上權力頂峰, 到底,佢有乜治國理念呢?

有分析認為, 習近平崇尚的新加坡模式, 可能會成為佢未來的治國方略。新加坡模式, 能夠達致經濟發達, 但政治專制, 確保到政權的穩定, 早喺習近平主政福建時, 佢已曾四訪新加坡, 07年,習近平升做政治局常委後, 第一個接見的外賓, 就係新加坡之父李光耀。

2010年,習近平晋身中央軍委副主席, 首個外訪的國家, 又係新加坡。維基解密就曾經引述美國外交電文話, 習近平政治態度保守, 「太子黨」對政治體制改革興趣不大。此外, 香港人對習近平熟悉, 仲有因為佢主管港澳事務, 身兼中央的港澳工作協調小組組長。

08年佢訪港期間, 提出的三權合作論, 就引咗好大的爭議, 當時佢對特區管治班子話
「團隊要精誠合作,行政、立法和司法三個機構,要互相理解、互相支持」。

香港司法界, 之後作出咗有力的反擊, 確保香港司法獨立。

十八大臨近, 近日,中央派員來港, 收集各界人士, 對習近平自07年起主管港澳事務以來的成效有何評價, 唔知各位聽眾會點樣比分呢 ?

另外,收風者仲透露, 中央部分官員, 對目前香港的情況, 感到擔心, 特區政府真係要爭氣啲啦。

好啦,今集同大家傾到呢到, 下集我會同大家解讀十八大開幕後的最新話題。

多謝收聽, 再會。

 

專題分類:中國熱話

最新專題