區議員王潤強:水貨客投訴少咗一半 居民:變咗晏晝啫
2015-09-07

反水貨示威平靜約半年後,本土團體昨日再發起「光復上水」行動。北區區議會石湖墟選區區議員王潤強在【自由風自由phone】說,自四月推出內地政府將一簽一行改為一周多行後,水貨問題有紓緩,「以前一日七個投訴,依家七日一個投訴!」 



王潤強指水貨客問題一直存在,「根本就無斷到」,但不少日用品水貨客轉投利潤較高的貴價品市場,例如凍肉、電器及魚竿,「呢d 嘢相對唔擾民,所以靜咗好多。」但這兩個星期接近中秋,水貨客轉走月餅,「依兩個禮拜又升返少少」。

他又說,北區區議會成立了市容小組,若發現有人將貨品擺在店舖門口,或者在門口拆貨,便會採取行動,又請在門口打開行李箱擺貨的水貨客離開,「滋擾市民的程度大大減少,唔係話無,同三月比少咗一半!以前一日七個投訴,依家七日一個投訴。」

王潤強認為,「光復上水」行動「只會趕走正常過夜嘅旅客,喺我嘅立場嚟講佢哋(水貨客)根本唔係客,而係工人,佢哋係受聘嚟搬嘢嘅」,對減少水貨客並無正面效果。

不過,上水居民並不同意王潤強的說法,多名聽眾不約而同致電節目指,水貨客只是調整了活動時間到下午,聽眾黃女士說:「朝頭早少咗,到晏晝三點上水火車站出面好犀利,我想由火車站行上電梯再經彩園商場去吉野家位置,行好耐至行到去」,要去海禧華庭後買豬肉亦很困難,「晏晝我依家唔會出街㗎喇」。其他聽眾亦指彩園邨商場對出平台「中午開始已經有人喺度pack貨」,新成路一帶亦聚集大批水貨客,「佢哋踎晒係分貨pack貨,成個工場咁」。水貨客遺留非常多垃圾,「我差唔多日日打去上水警署投訴」。

 

相關內容:

旅遊界立法會議員姚思榮:係咪要為小眾利益,打擊香港經濟一按即睇:http://app3.rthk.hk/special/pau/article.php?aid=1353#RTHK #香港電台 #香港電台公共事務組 #姚思榮 #光復行動

Posted by RTHK 香港電台公共事務組 on 2015年9月6日

 

 


【自由風自由 Phone】

香港電台第一台FM92.6 - 94.4

星期一至五 17:00-20:00

主持:陳燕萍、區家麟
評論員︰葉健民、黃任匡、戴希立、雷鼎鳴

監製:陳燕萍

製作團隊:鄭汝翹唐偉傑、黃曉玲

專題分類:中港矛盾
發表評論

最新專題