【香港家書】政治漫畫家 尊子
2016-01-09

Hi Lim,

早排你由新加坡來港渡假,我帶你去行山,一面行一互道近況。你好自然問到我香港近年新聞自由、言論自由有乜變化。

我話:有!大陸愈來愈打壓啦,傳媒愈來愈自律啦、河蟹橫行通街走啦…….

你一句窒埋嚟:唓,你咪日日喺度畫你嘅漫畫?!又唔見你失業領綜援?!!

Err….

唉,每日一步嘅退縮,細微嘅變化,加埋遮遮掩掩嘅包裝,一時間真係好難三言兩語說明俾外人知。

哈,好咯!!呢幾日發生咗嘅「銅鑼灣書店股東離奇失踪案」,以此做例,以後我一講你就明咯!!

五條書局友,出版中國政壇揭秘書,攞正牌照做生意,邊會有事?點知消失一個又一個,逐個失踪!最後一條,在香港光天化日下竟亦人間蒸發消失埋!!家人報案,警察不理,傳媒報導,全城嘩然,事情發酵,政府回應,差佬做嘢,向北查詢,碰得一鼻子灰,霎時六神無主。擦鞋政客,趁機撲出表演護主打完場,以烏賊戰術,誣衊苦主嫖妓又走私,愈描愈黑,拍案驚奇。

 

好彩內地官腔傳媒夠大方,做咗唔怕認:係呀!吹咩?拉咗嘞!點吖?!!嚇死你未?!!

傳媒記者,慢慢從各方消息,砌起拼圖,結論是恐怖過史提芬京、好笑過差理卓別靈、曲折過 J. K. Rowling,離奇過張愛玲,衰過日本仔拉壯丁。

Lim,我知你又會話:唓,我哋新加坡夠冇言論自由啦,一樣拉啲異見人士喎,冇影響新加坡學童嘅英語能力,大學排名仲升咗添,高過你地香港……..。

但阿 Lim, 你地新加坡可以「自己公民自己拉」,冇「跨境拉人」呢啲嘢噃。如果馬來西亞忽然捉咗個新加坡人去,我諗兩國打仗都似!!當年盧溝橋事變,都係由「失踪人口」引起,結果中日大戰,你同我都差啲做咗日本「皇民」。

好彩,或者當年起草基本法嘅人夠聰明,講明「國防、外交」,香港冇份,無可能引起戰爭。你估中國軍隊會向天九十度角發射飛彈然後等佢跌落嚟自己炸自己咩?

我地香港特首「愛國英」,一向強調中港合作,配合國家施政,積極參與一路一帶,所以如果你發現將來一地兩檢,原來係方便帶路捉人嘅話,一啲都唔意外呀。將香港冇犯法嘅市民送去過關,揮手自茲去,嘯嘯斑馬鳴,一幅好淒美感人嘅畫面!講到尾,特首都係人,都要為自己嘅前途打拼,下屆能否連任,同建制派嘅立法會議員一樣,靠嘅就係呢啲關鍵時刻站穩隊伍嘞。

Lim,話晒你哋新加坡係全世界獨裁國家嘅榜樣,想問下你,貴國嘅「強力部門」嘅編制係點樣?隸屬軍隊?警察?情報?消防?律政定海關?能夠「規避法律」又懂心戰攻防,應該好威猛。

不過,香港喺中國特別行政區,冇「強力部門」設立,全部都係由梁粉愛國立法會同區議員兼任,接受西環領導,本事唔細,間中甩轆,資源無限,最叻霸位,又會教市民扮漁民出海出入境可以規避海關,又識用護老院登記法催谷選票,面皮厚、嘴巴油。有咗佢地,警察揮棍毆打途人都有力D。

書店五友失踪,已引起書店同業恐慌,已經有書商收起「禁書」唔賣。長遠嚟講,我都為嗰D唔賣禁書嘅老闆擔心。因為世事無常,政治嘅嘢一天都嫌長,我哋點知薄熙來公子何時東山再起,或者佢啲粉絲一朝得勢,到時回過頭來秋後算帳──當年邊個唔肯賣習總情史書嘅,都是反動派!到時冇賣禁書嘅書商失踪一個又一個,香港特區人口漸漸減少,市面零售業都會受影響,你話幾咁可憐。

美國一個腦神經科醫生Oliver Sacks 寫過幾本書,描述神經受損病人的病歷,反覆提及人類大腦的神奇適應功能,某部份知覺缺失,便會自動發展另一部份能力以作補償,個案好鬼有趣。中國人嚐唔到言論自由滋味,於是補償發展了味覺,專注烹調嘅精巧,舌尖嘅享受。下次你嚟香港,會發現香港嘅美食又進一籌,自不待言。

下次見,Bye!

Best Regards,

尊子

2016年1月9日

 

 


【香港家書】

香港電台第一台FM92.6 - 94.4

星期六早上九點至九點二十分

監製 : 陳燕萍

學者、議員、官員及社會人士透過書信形式,分析社會現象,細訴個人感受。

專題分類:專題文章
發表評論

最新專題