【立法會主席爭奪戰】有意角逐者的自白
2016-09-26

新一屆立法會會期將於十月開始,新民黨田北辰、謝偉俊及經民聯梁君彥等皆表示,有意出任主席一職。田北辰及謝偉俊在《自由風自由Phone》詳述自己相比其他有意角逐者的優勝之處,以及是否取得中聯辦支持。



自己有何優點? 獲中聯辦支持? 若最後多於一名建制打算參選 自己會否退選?

問:「相比其他有意角逐者,自己有何優點?」

  • 田北辰:「我做全國人大代表,都第八年啦。我喺小組會議,張德江都見過三次啦。我又唔覺得我同中央冇溝通渠道啦。特首辦更係啦,司長呀、特首呀,我隨時都有機會見啦。講到建制泛民關係,我要承認,我同建制、泛民都唔叫好熟既老友記,但我覺得同兩邊關係唔係差、有計傾,亦唔會比人覺得係偏頗,喺裁決方面絕對係有優勝地方。(經驗同議事規則?)我唔係律師,但之前兩屆主席都唔係律師吖。」
  • 謝偉俊:「我既優勝係我缺點多啲,因為我既缺點就係『不群不黨』。第二,當然我都係第三屆議員。喺立法會資歷講,第一、第二(屆)可能太淺,但第三、第四都開始資深。第三,無可否認我係大律師、律師出身,一向關注議事規則或操作。第四,就係性格上,究竟邊啲人比較勤力啲、鐘意聆聽啲、會包容啲、或容易傾計啲,咁我諗大家都可以從我哋過去表現作一個判斷。」

 

問:「中聯辦有否聯絡及給予支持?」

  • 田北辰:「我有同佢接觸過,係因為佢想嚟摸底。我話佢知我絕對有興趣,我亦覺得係為香港大局著想,香港優良傳統係應該直選議員做既。OK? 咁我聽唔到有負面聲音。」
  • 謝偉俊:「一方面有機會溝通過,但同時亦未去到階段性,究竟最後情況點樣。當然香港人的事,特別立法會主席選舉,都係香港人作最後決定。咁呢個係有參考價值,但唔係一個最終決定。(中聯辦反應正面嗎?)兩樣都有,擔心亦有。有朋友認為多啲選擇係好事,但另一方面亦有擔心會否鷸蚌相爭,所以搞到好多混亂。」

 

問:「若最後仍有多於一名建制打算參選 自己會否退選?」

  • 田北辰:「建制如果去到最後出多過一個,一定會影響成個大局,絕對唔係我想見既。」「我唔會覺得到最後三個建制派會出啦,始終到最後一刻,我哋都會坐低協調既。」
  • 謝偉俊:「以我性格,當然我唔希望喺一個冇把握情況下夾硬要大家冒好大風險,以我咁多年歷練、經驗、知道幾時應該冒進、幾時應務實。或者我受過既教訓太多,所以都知幾時要作出適當平衡。」

 

另外,田北辰表示,若自己當選立法會主席,沒有可能繼續兼任港區人大,「時間問題都不容許可啦,係咪?」

 


 


【自由風自由 Phone】

香港電台第一台FM92.6 - 94.4

星期一至五 17:00-20:00

主持:陳燕萍、區家麟、馮德雄

評論員︰徐家健、李兆富、何濼生、任建峰、張楚勇

監製:陳燕萍

製作團隊:唐偉傑、黃曉玲、林詠雯、王磊

專題分類:新聞熱話
發表評論

最新專題