【中國點點點──閒話粵語#13】古老歇後語 你識幾多個?
2017-02-03

粵語咁引人入勝,其中一個原因,係有好多地道俚語,或者係講上半句,你就會明下半句嘅歇後語,通常人本地人先會有共鳴。香港城市大學中文及歷史學系教授程美寶喺《閒話粵語》再次攞返1828年出版嘅《廣東省土話字彙》,記載咗當時嘅歇後語。



有部分到今日大家都重會聽到嘅,而且好多都係負面添。例如「劏心肝佢食,都當你狗肺」,意思就係指你幫助嘅人唔領情。另一句少啲人講,但老一輩都可能用過嚟鬧人,所謂「人老花殘無藥醫」。

今日我哋所講嘅一啲句子,原來本身都屬於歇後語嘅一部分,例如「有麝自然香」,下一句係「唔在當風颺」,全句就係指如果一個人有才能,唔需要迎合潮流、招搖過市。

另一句勵志嘅歇後語,就係「拼死拼發瘋,係事都做通」,「拼」字發音類似「潘」嘅第五聲。

雞年將至,程美寶重介紹多一句同雞有關嘅歇後語,但都而家已經絕少人會聽過、講過,就係「大甕打瀉油,雞腸捋膏煎」,其實係批評緊一啲人做大事時粗心大意,會打瀉油,但係對細節就好執著、好孤寒,斤斤計較,大家記住喺新一年唔好變成咁嘅人啦!

 


中國點點點星期一至五 下午三點至四點半

編導:張鳳萍

監製:葉冠霖

【中國點點點】張鳳萍、黃曉玲、唐偉傑、劉銳紹、鄭漢良、呂秉權主持。每日話題由中國政情、至網絡熱話、旅遊、生活、閱讀,讓聽眾輕輕鬆鬆,每天對祖國知多一點點。

常設環節

星期一:最緊要識法、領導點點菜

星期二:對談中國

星期三:中國討論區;同聲同氣談天說地

星期四:點點評論;閱讀中國

星期五:漫遊中國;閒話粵語

專題分類:中國熱話
發表評論

最新專題