【中國點點點──閒話粵語#15】老鼠田螺亞婆裙 古歇後語聽到暈
2017-02-10

之前連續兩星期,同大家介紹咗有關雞嘅歇後語同俗語,古時廣東人嘅創意同智慧又點只於此?今次程美寶教授就喺《廣東省土話字彙》搵嚟以各種動物、親友做主角嘅俗語,你又睇吓認識幾多個?



首先介紹一啲有關動物嘅。今日我哋重會聽到有老人家講嘅「老鼠拉屐釘」,屐釘對老鼠嚟講,又唔食得,又無意義,其實就係話緊啲人成日做埋啲徒勞無功嘅嘢。

嚟緊兩個有關海產,第一個係「係嗰吓田螺,食嗰吓泥」,係比喻緊啲人應該知道自己喺邊個位置,做適當嘅嘢。第二個同古時嘅大富人家有關,「明知蠔殼牆,佢偏要撼埋去」,以前廣東一帶有錢人嘅大宅,外牆都會用好多蠔殼砌成一堵牆,除咗為美觀,亦因為可以令間屋散熱更加好,更加清涼。有蠔殼牆,仍要撼埋去,意思就係明知好危險都仍要做,勸啲人唔好做乜嘢都不顧一切。

跟住就到以人為主角嘅歇後語,同大家揭開上面幅圖嘅謎底,原來「火燒亞婆裙」,下一句係「各人顧各人」,意思係比喻人嘅涼薄,即使火燒到老人家嘅裙,大家都只係自己顧自己。

以下呢句就比較涼薄,「老公死,老公生,禾蟲過造就恨唔翻」,唔理自己老公、最親嘅人嘅死活,只顧眼前利益,就係呢啲人。

細聽呢啲俗語,不得不佩服創作佢哋嘅人,就會發覺全部都係以生活嘅小場景、片段去做比喻,帶出深意。重有邊啲歇後語呢,大家快啲聽吓程美寶教授介紹。

 


中國點點點星期一至五 下午三點至四點半

編導:張鳳萍

監製:葉冠霖

【中國點點點】張鳳萍、黃曉玲、唐偉傑、劉銳紹、鄭漢良、呂秉權主持。每日話題由中國政情、至網絡熱話、旅遊、生活、閱讀,讓聽眾輕輕鬆鬆,每天對祖國知多一點點。

常設環節

星期一:最緊要識法

星期二:對談中國

星期三:中國討論區;同聲同氣談天說地

星期四:點點評論;閱讀中國

星期五:漫遊中國;閒話粵語

專題分類:中國熱話
發表評論

最新專題