【中國點點點──閒話粵語#19】抵死纏綿唱粵謳
2017-03-10

先前嗰兩集,程美寶教授教咗大家音階化嘅粵語九聲,以及粵曲所用嘅歌譜「工尺譜」,感受到講粵語人口當中,濃厚嘅歌樂傳統。程教授就話,熟練咗「工尺譜」之後,如果想為粵曲或流行曲譜寫歌詞就變得簡單。



一般而言,寫詞都離不開兩種情況,就係「先曲後詞」,或者「先詞後曲」。

「先曲後詞」比較容易填到順耳嘅歌詞出嚟。但若果係「先詞後曲」,就要用「問字攞腔」呢個方法,用音樂配合返文字嘅聲調。例如「香港電台」,工尺譜顯示係「工尺士合」,簡譜音係「3、2、低6、低5」,如果用咗唔啱聲調嘅音樂,就容易鬧出笑話。

咁呢份歌樂傳統係幾時開始嘅呢?程美寶教授搵返之前我哋鑽研過,喺明末清初「嶺南三大家」之一嘅屈大均,所編寫嘅《廣東新語》(1700年版本) 。

書裡面記載,喺明代嘅廣東人已經好鍾意將粵語化成歌曲……

 

「粵俗好歌,凡有吉慶,必唱歌以為歡樂。」

意思就係唱歌係廣東人鍾情嘅集俗,凡有喜慶宴會,佢哋必定會唱歌慶祝。

 

「其歌也,辭不必全雅,平仄不必全叶。以俚言土音襯貼之。唱一句,或延半刻,曼節長聲,自迴自復,不肯一往而盡。」

呢度就係指當時嘅人唱歌,唔需要太計較平仄、文雅嘅問題,用俚語、土話都照樣可以出口成歌,而且佢哋更會唱到唔想停,特登拉長啲音節。

 

至於例子,就要留待程教授喺下回分解。


中國點點點星期一至五 下午三點至四點半

編導:張鳳萍

監製:葉冠霖

【中國點點點】張鳳萍、黃曉玲、唐偉傑、劉銳紹、鄭漢良、呂秉權主持。每日話題由中國政情、至網絡熱話、旅遊、生活、閱讀,讓聽眾輕輕鬆鬆,每天對祖國知多一點點。

常設環節

星期一:最緊要識法

星期二:對談中國

星期三:中國討論區;同聲同氣談天說地

星期四:點點評論;閱讀中國

星期五:漫遊中國;閒話粵語

專題分類:中國熱話
發表評論

最新專題