【中國點點點──閒話粵語#20】長篇動聽摸魚歌
2017-03-17

上星期嘅《閒話粵語》,講到幾百年前嘅廣東人已經有深厚嘅歌樂傳統,喜歡喺喜慶時唱粵歌,其實唱歌又點會止於喜慶場合?

香港城市大學中文及歷史學系教授程美寶就提到,明末清初時流行一種「摸魚歌」,更由此衍生賣唱行業。



程美寶提到,根據屈大均編寫嘅《廣東新語》,當時嘅「摸魚歌」可以好長,從以下呢句可知一二:「其歌之長調者……至數百言、千言,以三絃合之。」歌詞可以上千字,以三弦琴伴奏。

咁喺幾時唱呢?「婦女歲時聚會,則使瞽師唱之。」程美寶話,意思係指婦女喺一啲定期聚會,可能會自己唱,而多數時候會邀請「瞽師」嚟唱。「瞽師」就係當時嘅賣唱人,而佢哋大多數係失明人士,因歌藝精湛而形成一種行業。

而當時亦有一啲粵歌會經口耳相傳,喺民間成為流行嘅樂韻。《廣東新語》提及,唔少女士唱呢啲歌比較上口:「女子天機所觸,雖未嘗目接,詩書亦解,白口唱和,自然合韻。」意思就係指,唔少女性都比較有天資,唔需要睇住曲譜、歌詞,就識得唱,「白口唱和,自然合韻」,清唱就可以唱出一首好歌。

呢一啲歌曲傳統上一般係口耳相傳,但逐漸有人希望記錄落嚟,所以就寫下一本本以文字編成嘅「木魚書」,例如著名嘅清代民間故事《梁天來告御狀》,喺近代曾被翻拍成電影同電視劇。粵樂嘅傳統,就以各種不同方式,流傳後世。

 


 

中國點點點星期一至五 下午三點至四點半

編導:張鳳萍

監製:葉冠霖

【中國點點點】張鳳萍、黃曉玲、唐偉傑、劉銳紹、鄭漢良、呂秉權主持。每日話題由中國政情、至網絡熱話、旅遊、生活、閱讀,讓聽眾輕輕鬆鬆,每天對祖國知多一點點。

常設環節

星期一:最緊要識法

星期二:對談中國

星期三:中國討論區;同聲同氣談天說地

星期四:點點評論;閱讀中國

星期五:漫遊中國;閒話粵語

專題分類:中國熱話
發表評論

最新專題