【中國點點點──閒話粵語#22】上花艇 聽南音
2017-03-31

喺上一集,程美寶教授為大家開金口,示範咗著名嘅地水南音歌曲《客途秋恨》嘅起式,聽過教授動聽演譯,今集《閒話粵語》,我哋就去探索一下,究竟最早係幾時開始有人唱南音?



之前我哋提及過,南音大概係清朝中葉出現,到二十世紀初達到高峰。

香港城市大學中文及歷史學系教授程美寶表示,有關南音嘅文字記錄,比較早可以追溯到一位文人──謝蘭生喺嘉慶廿五年 (公元1820年) 所寫嘅日記《常惺惺齋日記》。謝蘭生寫低自己到珠江荔灣,上咗一首花艇 (下圖所示),喺風花雪月嘅同時,更重要嘅係喺艇上邊賞月色,邊聽南音,佢仲寫到當時會「請客食魚生兼聽南音」,一窺當時廣州人嘅賞樂文化。

以下三張圖畫都係當時嘅花艇:

1. 荷蘭萊頓民族學博物館藏品(19世紀)

 

2. 明信片 (網上圖片)

 

3. 1908年廣州出版的《時事畫報》

 

回顧呢幾集介紹過嘅曲種,先有「摸魚歌」、「龍舟」,再有「南音」。程美寶教授話,早前幾集提過嘅「粵謳」,其實就係喺十九世紀中段「南音」興起後,出現嘅一種新式粵語曲種。教授指出,當時有唔少外省文人,移居到廣州生活,佢哋聽開嘅音樂,往往係「秦腔」、「梆子」、「崑曲」,呢啲用外地語言唱嘅歌曲,與廣東音樂曲風不同,自然對廣東人本身流行嘅音樂造成變化,逐漸演變出用粵語唱嘅「粵謳」。而根據《常惺惺齋日記》,「粵謳」也是在珠江花艇上,由歌姬演唱。

 


中國點點點星期一至五 下午三點至四點半

編導:張鳳萍

監製:葉冠霖

【中國點點點】張鳳萍、黃曉玲、唐偉傑、劉銳紹、鄭漢良、呂秉權主持。每日話題由中國政情、至網絡熱話、旅遊、生活、閱讀,讓聽眾輕輕鬆鬆,每天對祖國知多一點點。

常設環節

星期一:最緊要識法

星期二:對談中國

星期三:中國討論區;同聲同氣談天說地

星期四:點點評論;閱讀中國

星期五:漫遊中國;閒話粵語

專題分類:中國熱話
發表評論

最新專題