【中國點點點──閒話粵語#23】多情自古唱粵謳
2017-04-07

介紹過「摸魚歌」、「南音」,程美寶教授今集就詳細介紹何謂「粵謳」。咪以為今時今日少人講起少人唱就代表粵謳息微,其實粵謳嘅內容,同呢個年代盛行嘅廣東話K歌有異曲同工之妙。



呢隻曲種自嘉慶道光年間開始興起,係珠江花艇上,歌姬用粵語創製嘅一種曲調,內容多為男女之情。程美寶教授搵到一本古籍叫《粵謳》,係喺道光八年,亦即公元1828年9月出版,由「銘山」所編纂,「銘山」嘅真實身份就係一位名為「招子庸」嘅文人。

招子庸係南海橫沙人,係嘉慶21年 (1816年) 嘅舉人,做過山東幾個地方嘅知縣。《粵謳》就係招子庸經過加以雅化、修飾之後嘅一部粵謳集合。當時呢本書喺廣東省城西關出版,其後一紙風行,一版再版,成為今日仍然流傳嘅粵謳文本。

程美寶教授話,粵謳最大嘅特色,就係內容同用詞,以至演繹嘅音調,都「抵死纏綿」,盡顯男女之間嘅愛恨交纏。程美寶更即場演繹其中一首粵謳,大家一齊欣賞一下:

《累世》

真,真正累世。乜得你咁收人。

枉費你妹,從前個一片心。

多端扭計,你妹情願受困。

思前想後,試睇待薄過你唔曾?

做乜兮離咁耐哩,就學王魁咁薄行?

我之要問明,邊一個唆攪你之係自己生心?

兵行詭路,你妹心唔忿。

唉,情可恨。

一刀斬斬斷兩橛,丟開你妹唔使掛恨啐。

捨得我待郎敢樣子,心事愁冇個至愛情人。

 


中國點點點星期一至五 下午三點至四點半

編導:張鳳萍

監製:葉冠霖

【中國點點點】張鳳萍、黃曉玲、唐偉傑、劉銳紹、鄭漢良、呂秉權主持。每日話題由中國政情、至網絡熱話、旅遊、生活、閱讀,讓聽眾輕輕鬆鬆,每天對祖國知多一點點。

常設環節

星期一:最緊要識法

星期二:對談中國

星期三:中國討論區;同聲同氣談天說地

星期四:點點評論;閱讀中國

星期五:漫遊中國;閒話粵語

專題分類:中國熱話
發表評論

最新專題