【中國點點點──閒話粵語#29】畫盡時事 喚醒人心
2017-05-24

時局越亂,越多人希望敲響警世鐘。上集《閒話粵語》,程美寶教授為我哋介紹清末嘅文人,以當時嶄新嘅「石印」技術印刷報紙,將諷刺時弊嘅粵謳,以及寓意站起來爭取自由嘅「自由鐘」印喺報紙,喺民間流傳。

唔只係報紙,靠新科技,當時更複雜嘅刊物都可以印刷,今集就同大家講講《時事畫報》。



1905年,清廷病入膏肓,中國幾近滅國,畫家潘達微聯同文人高劍父、謝英伯等人,喺廣州創立《時事畫報》。程美寶教授形容《時事畫報》係一個「多媒體」,集文字、圖畫、歌謠於一身,內容有論說、時事報道、詩詞,亦有大家聽完呢幾集都好熟悉嘅粵謳。

同一般報紙唔同,《時事畫報》裡面有好多圖畫,原因係參與呢本刊物嘅人,大多數都係畫家。內容主調係反映當今時勢,意識形態上係鼓動民眾參與同盟會組織革命,推翻清朝。

而為咗宣傳《時事畫報》,編者們寫咗一首同名粵謳,喺創刊號刊登,一齊聽吓程美寶教授演繹一番:

《時事畫報》

時事駛乜你報,有畫就唔同。一枝妙筆巧奪天工。

任你舌敝唇焦,唔講得佢咁切痛,任你受摹指畫,亦唔顯得佢咁玲瓏。

 

呢箇畫報主人,心血熱湧;欲把國民喚醒,免在夢魂中。

紙上畫作悲觀最得人心動,筆墨通靈色相可窮。

眼見與共耳聞,同一妙用,人見重,敢把芻蕘貢,有乜人間怪象,都要極地形容。

 

其中尾句嘅「芻蕘」,係指割草、柴火。程美寶就認為,內容就透露參與畫報製作嘅人,都希望「有錢出錢,有力出力」,將人間怪象悉數陳述,為公義、自由陳情。

 


中國點點點星期一至五 下午三點至四點半

編導:張鳳萍

監製:葉冠霖

【中國點點點】張鳳萍、黃曉玲、王磊、劉銳紹、鄭漢良、呂秉權主持。每日話題由中國政情、至網絡熱話、旅遊、生活、閱讀,讓聽眾輕輕鬆鬆,每天對祖國知多一點點。

常設環節

星期一:最緊要識法

星期二:對談中國

星期三:中國討論區;同聲同氣談天說地

星期四:點點評論;閱讀中國

星期五:漫遊中國;閒話粵語

專題分類:中國熱話
發表評論

最新專題