【中國點點點──閒話粵語#30】官府打貪?有歌有真相!
2017-05-26

清末新媒體冒起不絕,當時嘅文人如何用畫、歌詞、文字呢幾項「多媒體」為讀者報導真相?今集《閒話粵語》就為大家介紹清末官府如何打貪。



話說喺1905年,廣東海關官員周東生侵吞庫款,被兩廣總督岑春煊查辦,查封佢喺廣州及鄰近地區嘅產業。當時嘅聞紙就記載,官府查封其中一間屋嘅時候,見到周東生妻子馬氏嘅房間入面,「有紫檀床一張、檀香通花枕頭兩個」、「室內客鋪,均用彈弓床;婢妾床內,均用顧繡綿枕」。

周東生呢間大屋面積龐大,有大屋、戲台、廳堂約21間房,「曲折玲瓏,每間俱有青雲路一條,以為開通大路。電燈到處,皆有數十丈,一遇夜間,光明如晝。」

呢段查抄嘅經歷,就被當時嘅新聞紙寫成一首南音傳誦。程美寶教授為我哋演繹:

《港中分別》
十年人事幾遷移,世態炎涼點話得晒過你知。
天上風雲多係不測,鏡花水月頓起思疑。
富貴無常從古語,持盈保泰總要知機。

近日周家有段查抄事,講起番來兩淚漓。
煙婆聞風逃至港,星夜奔馳實在可悲。
東生在滬濱留佢不住,潛逃回港共商機宜。
知道廣東非係藏龍所,暹羅匿跡係要一去如飛。
煙婆依依難捨別,設筵祖餞就在個處臨岐。

歌詞中提到嘅「東生」,就係指周東生,而「煙婆」就係周東生嘅太太馬氏。程美寶教授就話,歌詞繪形繪聲,描述周東生夫婦如何籌謀潛逃之事,而除咗呢幾句南音,當時新聞紙亦都詳細描寫馬氏嘅掙扎:「周東生之資財,多在其妻馬氏掌握,風聞初四日正在大屋聽留聲機器,忽接電報,立命僕人弄飯,搭夜輪赴港。恐波及港業,復將港寓之夾萬十餘個撬開,將金銀珠寶轉運別處安頓,已請狀師辯護,連打數電往上海,未接東生覆電,隨又專人赴申,查其實落,以便密商云。」

程教授又指,當時嘅報紙就報道,周東生由上海抵達香港之後,就再潛逃往暹羅 (現今泰國) ,所以《港中分別》嘅歌詞並非老作。而之後更有文人將周東生等貪官事跡,寫成連載小說《廿載繁華夢》,為小市民吐烏氣,亦向為官者立下警惕。

 


中國點點點星期一至五 下午三點至四點半

編導:張鳳萍

監製:葉冠霖

【中國點點點】張鳳萍、黃曉玲、王磊、劉銳紹、鄭漢良、呂秉權主持。每日話題由中國政情、至網絡熱話、旅遊、生活、閱讀,讓聽眾輕輕鬆鬆,每天對祖國知多一點點。

常設環節

星期一:最緊要識法

星期二:對談中國

星期三:中國討論區;同聲同氣談天說地

星期四:點點評論;閱讀中國

星期五:漫遊中國;閒話粵語

專題分類:中國熱話
發表評論

最新專題