【中國點點點──閒話粵語#31】花旗毒計齊拒約
2017-06-02

今時今日,華人地位逐漸提升,同往日被歧視、被排斥嘅日子漸行漸遠。但無論喺咩年代,遇上排華舉動,中國人都會群起抗爭。

十九世紀末,美國政府推動排華法案,就觸發旅美華僑一連串嘅反抗、示威,後來更演變出「拒約運動」。當時喺廣州嘅華人如何用粵謳諷刺美國人嘅政策呢?



香港城市大學中文及歷史學系教授程美寶今集搵嚟一首名為《除是冇血》嘅粵謳,歌名似乎語焉不詳,但內容就將作者嘅憤怒表露無遺。

呢首歌刊載喺1905年5月31日出版嘅《廣東日報》附刊《一聲鐘》,即刻睇吓歌詞全文:

《除是冇血》

除是冇血,邊得話唔嬲!

君呀!你睇吓花旗,幾毒嘅計謀!

 

條條禁約,總總唔相就。

要把我哋華人,逐個個去收。

計吓二十年來,嗰啲咸苦捱夠。

望到呢陣從新訂約,點好重愛惜嚨喉。

 

快啲商量抵制,開吓個同胞口。

有四萬萬人聲,不必靠到滿洲。

 

第一要把佢貨物唔銷,等佢知吓伯爺係老豆。

不久佢哋個工人喊苦,就要把我哋哀求。

嗰陣我隻耳仔冇得閑,遊了去別埠。

好似阿跛踢燕,一味唔兜。

 

佢一日唔肯轉心,我一日唔肯罷手。

唉!真正抵手,此計係誰人扭?

捨得大眾都係咁齊心,怕乜共佢對頭。

美國政府嘅排華法案 (Exclusion Act),其實喺1882年已經實施,旨在暫緩華人移民到美國嘅申請,喺跟住落嚟嘅十幾二十年,美國多次收緊法案內容,更進一步限制華人逗留美國嘅時間及移民申請嘅難度。

喺1884年,美國要求清政府簽訂限制華工到美國嘅條約,禁止新去美國嘅華人入境,原定10年期滿嘅條約,後來被美國兩次自行續約,到1904年,中國曾要求廢約,但美國提出續訂新約,引發中國民眾反彈,「拒約反美運動」應運而生。

直到光緒31年,亦即1905年嘅5月10號,上海總商會號召全國各地工人,如果兩個月內美國不肯廢約,就會實行抵制美貨。大家可以見到《除是冇血》當中,有提到「快啲商量抵制,開吓個同胞口。有四萬萬人聲,不必靠到滿洲。」可見當時文人希望透過媒體嘅影響力,令民眾群起反抗,亦都覺得唔需要靠積弱嘅清政府。而歷史嘅變化亦都證明,當時文人們嘅諗法冇錯,因為清政府受唔住美國駐華領事嘅壓力,反過嚟鎮壓中國國內嘅反美運動,更拘捕「拒約會」發起人。

但呢種動用媒體帶起輿論嘅力量,已經成為不可逆轉嘅模式,對幾年後清皇朝嘅覆滅,立上一尊踏腳之石。

 


中國點點點星期一至五 下午三點至四點半

編導:張鳳萍

監製:葉冠霖

【中國點點點】張鳳萍、黃曉玲、王磊、劉銳紹、鄭漢良、呂秉權主持。每日話題由中國政情、至網絡熱話、旅遊、生活、閱讀,讓聽眾輕輕鬆鬆,每天對祖國知多一點點。

常設環節

星期一:最緊要識法

星期二:對談中國

星期三:中國討論區;同聲同氣談天說地

星期四:點點評論;閱讀中國

星期五:漫遊中國;閒話粵語

專題分類:中國熱話
發表評論

最新專題