【中國點點點──閒話粵語#32】清末商家要「知機」
2017-06-09

上星期提及過1905年發生嘅「拒約運動」,當時喺廣州、上海等大城市,有商會、工會中人喺民間發起抵制美貨行動,抗議美國要求清政府簽訂條約延續排華法案。拒約未成,卻反被清政府鎮壓。

雖然「拒約運動」商家都有份發起,但其實佢哋自身都有好複雜嘅商業考量……



程美寶教授今集就演繹咗喺1905年10月7日嘅《有所謂報》記載嘅粵謳,睇吓當時嘅商家點樣喺半推半就嘅情況吓參與「拒約運動」。

 

《中秋餅》

中秋餅,委實係行時。

佢要用油糖面粉,邊一個唔知。

製造雖出自唐人,材料有來自異地。

睇吓餅皮麵粉,就係貨辦花旗。

 

中秋月餅嘅麵粉,正正就係來自「花旗大國」美國,而美國麵粉,就係「拒約」嘅重點對象,難怪商家都覺得無奈。

 

近日傳播抵制嘅風聲,何處不是?

我哋餅行用貨,總要知機。

若係照舊日咁樣做來,銷售恐怕不易。

齊聲指摘美貨,我就無乜言詞。

嗰陣月餅仲係合時,亦怕到會唔發市。

人人上咗抵制嘅癮,冇藥能醫。

 

我索性把美麵丟埋幫襯別處。

或者用回土貨,更覺相宜。

自古話世界想撈,須要隨吓眾意。

 

唉!唔係小事,為國來爭氣。

呢陣我哋餅行唔用美麵咯,不愧愛國男兒。

 

喺呢種民族同仇敵愾嘅氣氛之下,商家都心中嘆氣一句「總要知機」,暫時唔好用美國麵粉,否則畀民眾知道,可能自己嘅貨,就成為被針對攻擊嘅對象,所以「世界想撈,須要隨吓眾意」。可見當時嘅粵謳唔只係一面倒表達一種立場,亦都會顧慮到社會上唔同嘅聲音,為民發聲。

 


中國點點點星期一至五 下午三點至四點半

編導:張鳳萍

監製:葉冠霖

【中國點點點】張鳳萍、黃曉玲、唐偉傑、劉銳紹、鄭漢良、呂秉權主持。每日話題由中國政情、至網絡熱話、旅遊、生活、閱讀,讓聽眾輕輕鬆鬆,每天對祖國知多一點點。

常設環節

星期一:最緊要識法、領導點點菜

星期二:對談中國

星期三:中國討論區;同聲同氣談天說地

星期四:點點評論;閱讀中國

星期五:漫遊中國;閒話粵語

專題分類:中國熱話
發表評論

最新專題