【中國點點點──閒話粵語#40】民初也有補習名師?
2017-08-04

帝王時代嘅中國教育,集中以八股文教化小朋友,但到晚清開始,傳統嘅課本開始受到質疑,到外國「浸過鹹水」嘅新派教師,喺晚清開始編寫新式中文課本,透過私墊等自由度較大嘅教育機構,將新派思想流傳開去。

當時呢種新派教育有冇任何代表一物?今集《閒話粵語》程美寶教授同大家娓娓道來。



上集提到,古時學校嘅中文課,有一啲傳統嘅課文,以「三百千」或者「三四五」為主,統稱為「蒙學課本」,亦即啟蒙小朋友嘅課文。

三字經當中嘅「人之初,性本善」,四字經例如「天地玄黃,宇宙洪荒」都係蒙學課本必備之選。程美寶亦引出五字經例子,如:「天子重英豪,文章教爾曹,萬般皆下品,唯有讀書高。」可以見到,呢類「三四五」字經主要形容帝王將相或者思想,亦將讀書視作唯一嘅價值,形容得太抽象,對人嘅行為唔能夠有任何指導性,喺晚清時期逐漸引來質疑。

上集提到澳門廣播界前輩梁送風細個學習嘅「新式三字經」,教小朋友點做家務,原來仲未完,今集程美寶教授繼續演繹:

「早起身,下床去,先灑水,後掃地,開窗門,抹枱椅。

洗完面,入學堂,見先生,要叫聲。

坐書位,即讀書,讀熟書,又寫字。

筆共墨,要齊整,書枱上,要乾淨,凡坐位,身要正。

──出自《婦孺三四五字書》

程美寶指出,當時推動呢類新式課文嘅人,都係思想上較前衛,代表人物當數陳子褒 (1862-1922) 。

陳子褒喺20世紀初,係馳名省港澳嘅「塾師」(私人學校教師 / 私塾教師) ,對革新中文教育起關鍵作用。佢1893年中舉,與康有為同科,甚至名列康有為之前,但由於佢欣賞康有為嘅前衛思想,所以步入「萬木草堂」向康有為執弟子禮。其後,康有為、梁啟超推動戊戌變法失敗,維新黨人四出逃走,陳子褒亦都唔例外,佢逃到日本,乘機考察當地嘅小學教育,深受日本教育家福澤諭吉啟發。

後來佢返到廣東實踐教育理想,如何實踐?下回再續。

 


中國點點點星期一至五 下午三點至四點半

編導:張鳳萍

監製:葉冠霖

【中國點點點】張鳳萍、黃曉玲、王 磊、劉銳紹、鄭漢良、呂秉權主持。每日話題由中國政情、至網絡熱話、旅遊、生活、閱讀,讓聽眾輕輕鬆鬆,每天對祖國知多一點點。

常設環節

星期一:最緊要識法、領導點點菜

星期二:對談中國

星期三:中國討論區;同聲同氣談天說地

星期四:點點評論;閱讀中國

星期五:漫遊中國;閒話粵語

專題分類:中國熱話
發表評論

最新專題