【中國點點點──閒話粵語#42】兒時記憶三字經
2017-08-18

清末民初政治局勢混亂,但同時係科技日新月異嘅年代,西方人一手硬,一手軟,除咗軍事上佔據中國,佢哋嘅新發明同時大批流入民間。

上期《閒話粵語》,程美寶教授就開始介紹「名物三字書」,火水燈、火輪船呢啲火器,同宮座椅、貴妃床呢類舊物新舊「碰撞」,成為小朋友嘅中文堂新式課本。



重溫一下程美寶上星期介紹嘅幾句:

各物件,在眼前。
火水燈、火輪船、
雞毛掃、鵝毛扇。
宮座椅,貴妃床。

新舊名物,點只咁少?接住落嚟仲有好多新發明排住隊等你認識:

千里鏡,百葉窗,山水畫,茄楠香。

欲窮千里目,上一層樓當然需要,但配備一副「千里鏡」,亦即係望遠鏡,似乎效果更佳。

自來火,自鳴鐘,梳篦盒,水烟筒。

第一個詞語「自來火」,程美寶教授解釋,其實係火柴。而當時係時興用「自」形容新發明,取其「自動生成」嘅特點。除咗自來火,仲有「自來水」,以及上句排第二嘅「自鳴鐘」,亦即係鬧鐘。

梳篦盒以及水烟筒都屬於當時嘅舊物,梳篦盒顧名思義就係放梳嘅盒。

磁器樽,玻璃盅,剃頭刀,踏腳凳。

蚊帳鈎,睡鋪繩,刨花碗,蒲草鞋。

當中比較特別嘅,係「刨花碗」,程教授指出,民國時期嘅人,會用榆樹刨出嚟嘅木片,放到熱水浸泡,最後製作成髮膠,亦即今日所講嘅定型劑。

從以上幾句三字書,可以見到唔少婦女用嘅飾物,皆因呢本三字書就係出現在《婦嬬三四五字書》當中,目的就係為教育鄉村嘅婦女、小童識字。

除咗物件,有另一款三字書可能勾起聽眾、讀者們嘅共鳴,係列出兒時嘅記憶,以及喺屋企附近遊玩嘅物件、設施:

我所住,住高樓。青草地,打千秋,放紙鷂,踢皮毬。
打鑼鼓,彈琵琶,帶枝劍,騎匹馬。學燒槍,試打靶。
唱隻歌,摘朵花,捉白鴿,拍烏蠅,扯大纜,拉麻繩。打跟斗,舞啞鈴。

玩完一大輪,當然唔可以玩物喪志,要乖乖返去讀書:

入書館,讀籌書。開枝筆,寫行字。
到夜晚,得閒時,睇報紙,讀唐詩。

睇過呢啲三字書例子,你又鍾意新式貼地版本,抑或由細聽到大嘅講道理版本呢?


中國點點點星期一至五 下午三點至四點半

編導:張鳳萍

監製:葉冠霖

【中國點點點】張鳳萍、黃曉玲、王 磊、劉銳紹、鄭漢良、呂秉權主持。每日話題由中國政情、至網絡熱話、旅遊、生活、閱讀,讓聽眾輕輕鬆鬆,每天對祖國知多一點點。

常設環節

星期一:最緊要識法、領導點點菜

星期二:對談中國

星期三:中國討論區;同聲同氣談天說地

星期四:點點評論;閱讀中國

星期五:漫遊中國;閒話粵語

專題分類:中國熱話
發表評論

最新專題