【香港家書@20230211】香港理工大學酒店及旅遊業管理學院助理教授梁堯忠
2023-02-13

香港理工大學酒店及旅遊業管理學院助理教授梁堯忠——政府與業界需合力解決根本性問題 以應對周邊地區競爭、吸引遊客

親愛的麥樂文教授:

不知不覺你已經離開我們學院大約四年,不知你在澳洲的退休生活如何呢?不知你是否還跟以往一樣,每天都埋頭苦幹地想辦法怎樣可以幫到旅遊業有更長遠更健康的發展呢?

告訴你一個好消息!香港–一個你居住超過20年的地方,一個你認定為第二個家的地方 - 終於在今年二月將已經關閉了差不多三年的關口重新打開。香港旅遊業終於都捱過了歷史上其中一個最漫長的寒冬,再次向內地和國際遊客說聲「歡迎來到香港」!

 

此刻,我相信你和很多曾經來過香港的遊客的心情都一樣,急不及待去訂機票和酒店,再次來香港感受一下這個亞洲國際都會的活力和品嚐香港最出名的美食。

 

但與此同時,我相信你和我心裏都有兩個疑問:究竟以往香港吸引到眾多旅客訪港的優勢還存在嗎? (2) 係過去呢三年, 香港有無裝備好好自己以及俾出足夠的誘因吸引旅客再次黎臨香港呢

 

仲記唔記得幾年前٬ 我地討論過 “香港係購物天堂呢個刻板印象係一把雙刃劍” 呢個課題◦ 係一個疫情前我地做的調查入面, 好多訪港旅客特別係中國遊客都同我地講 - 購物天堂係佢地對香港最深嘅印象◦ 雖說香港政府有嘗試推廣綠色旅遊٬ 生態旅遊٬ 務求將香港嘅目的地形象多元化◦

 

但係始終受惠於零關稅以及零消費稅, 再加上唔駛拿簽證以及交通上的便利, 香港係購物天堂呢個刻板印象的確係可以吸引好多高消費力同高購買力的中國遊客來港旅遊◦ 但係隨住呢幾年網上購物愈來愈普及, 再加上香港嘅一些競爭對手例如海南, 澳門同新加坡都推出類似嘅購物優惠措施, 香港係購物天堂呢個優勢就變得蕩然無存◦

 

當然我理解, 政府不可能係一時三刻就可以改變到遊客對香港嘅印象◦ 但最起碼我覺得政府同商家應該努力去維持 - 香港仍然係購物天堂嘅呢個招牌◦ 最近我睇一個關於曼谷嘅旅遊節目, 主持話當地好多商場都改建成多元化嘅大型購物中心◦ 係個 d 改建嘅購物中心入面, 佢既有國際知名品牌嘅高級商圈, 亦都劃分一部份區域作為開放式市集俾唔同嘅本土品牌以及小店售賣有特色商品◦ 反觀香港, 雖然我地有好多商場, 但係入面嘅商鋪來來去去都係個幾個品牌◦ 某程度上遊客只要去一個完商場就唔須要去第二個, 因為第一個同第二個可以搵到的商鋪幾乎係一模一樣◦

 

其實香港自身都有好多好出色的手工業人才◦ 當然好多人會話佢地製作嘅產品名氣上不及一些國際牌子, 但係佢地產品獨有嘅本土特色亦都唔係批量生產的公司嘅產品可以媲美◦ 如果政府或者商家可以為呢 D 具本土特色嘅小店提供租金優惠, 容許佢地可以進駐人流高嘅商場, 咁樣做不單只可以將商場店舖嘅種類變得更多元化, 更加可以令遊客來港的購物體驗變得不再 “單一化”◦

 

除左優化購物設施外, 我相信你都同意政府應該要積極同本地團體合作發展文化深度遊◦ 唔知你仲記唔記得係離開香港, 移居澳洲之前٬ 我地一齊參加過一個名為”神祇之旅”的本地團◦ 個個團的導遊帶左我地去左參觀文武廟, 觀音廟, 北帝廟, 天后廟等等◦ 如果唔係參加過個次本地團, 我呢個香港仔同好多訪港旅客一樣都唔知道每間廟同每個神祇背後的故事◦ 如果唔係參加過個次本地團, 我地都唔知每間廟有獨特嘅參拜方式同禮儀◦

 

其實香港好多區都仲保留一 D 歷史痕跡, 好多地方都可以為深度遊提供素材◦ 例如好多人都係香港電影睇到去茶樓飲飲茶嘅場景, 但係究竟點解我地幫人倒茶時要敲檯? 好多遊客都知香港有好多離島, 但係點解長洲叫長洲? 坪洲叫坪洲? 呢 D 咁有本土文化特色同有趣嘅事不單可以俾未黎過香港的旅客知道香港不只是只係購物的地方◦ 發展文化深度遊亦都可以俾曾經黎過香港的旅客另一個佢地再黎香港嘅誘因◦ 當然政府除左推出鼓勵計劃以及提供財政援助, 相關旅遊的部門亦都要積極統籌同推廣本地旅行社甚至地區團體推出的本地團, 例如旅遊發展局可以安排一 D知名歌星或者演員參加地區團體推出的本地團, 透過佢地嘅社交網絡俾更多外國人知道有關嘅香港特色故事◦

 

另外, 雖然我知咁樣講有一部份人唔會鍾意, 但係香港自身的而且確未必有足夠嘅誘因鼓勵遊客逗留一段長時間◦ 係疫情期間, 雖然我地興建同翻新左好多旅遊設施 (例如山頂纜車, 香港故宮博物館), 但始終香港因為地少, 唔可以好似其他著名目的地咁可以提供多元化嘅景點◦ 為左彌補呢一點, 香港政府應該積極同其他大灣區城市發展 “多站式旅遊”◦ 透過自身係航空同鐵路交通上嘅優勢, 香港應該積極爭取成為大灣區旅遊的交通樞紐◦ 無論旅客係以澳門, 中山, 廣州或者其他大灣區城市作為目的地, 香港都可以因為扮演中途站嘅角色而受惠◦

 

最近我受到一間本地電台嘅邀請, 分享一下香港的旅遊業係同內地通關後可否好快回復返去疫情前的水平◦ 雖然我個人好想呢件事會發生, 但係作為一個研究旅遊呢個課題好多年的學者, 我相信你同我都知道 – 好多遊客的旅遊模式已經改變, 好多鄰近周邊地區已經係疫情期間大力改善佢地的旅遊設施◦ 如果香港想要維持佢係遊客心中的吸引力٬ 政府同旅遊業一定要同心協力去解決一些根本性問題◦ 唔知你又會點答呢條呢? 希望你會回呢一封信並分享一下你嘅諗法俾我知!

 

學生 梁堯忠

敬上

2023年2月11日

【聲音完全版】


【香港家書】

香港電台第一台FM92.6 - 94.4​星期六早上九點至九點二十分

主持:張鳳萍
編導:張鳳萍
監製:林嘉瑜

學者、議員、官員及社會人士透過書信形式,分析社會現象,細訴個人感受。

專題分類:專題文章

最新專題