【走過十年】: 二十三條之後-中港矛盾
2013-05-24

香港中文大學政治與行政學系副教授黃偉豪認為03年是中央香港一個分水嶺。03年23條遊行前,中央給香港很大的自主權去決定內部事務,但03年後,中央覺得香港人已失控。中文大學政治與行政學系副教授黃偉豪話,03年之後,中央在香港希望各項事務都有角色。



黃偉豪:「梁振英謝票,唔係好似曾蔭權用巴士去同市民揮手,而係去中聯辦。內地官員評香港政策意見比十年前多左好多,包括限奶令都成為中港官員互相指責,官員批論香港事務比十年前多好多大膽好多。」

經濟矛盾社會矛盾在過去十年有增無減。
黃偉豪:「中港矛盾在這十年,由政治性的對抗,擴散到經濟上的矛盾,好多自由行落嚟令香港的地或舖都貴咗,仲激化香港貧富懸殊的矛盾,政治矛盾變成經濟矛盾,再演化至社會矛盾。」

有年青人在遊行時展示殖民地年代的龍獅旗,越來越多示威既對象,由以往的政府總部,轉陣到西環的中聯辦。
黃偉豪:「佢哋唔覺得係干預,中央關心香港係理所當然的事,佢地覺得呢啲干預冇問題,冇違反一國兩制﹔另一方面,幫中國同香港進一步融合,佢唔覺得係違反香港人的福祉同當年中美聯合聲名的承諾」

不過,一國兩制研究中心總裁張志剛則認為兩地融合,乃是香港自身需要。
張志剛:「提出既(融合)完全唔係中央政府,中央甚至叫你地諗清楚,自由行,係咪真係想咁樣先?」
他認為,在兩地融合的過程中,各階層都能受惠,但同時亦出現一些副作用。
張志剛:「最高層次國企來上市,中層專業人士CEPA,基層自由行。依家一年有兩千幾萬人來香港,交往多咗咁多先有依家種種矛盾。」

「矛盾全世界有競爭就有,如果你咁唔滿意既話,依家唔好要自由行,關閘,得唔得?問下香港人呀,梗係唔得。你可以同一時間想要自由行的經濟好處,帶嚟新既職位,舖租貴咗,舖租貴顯示你個地方值錢。經過融合既過程,香港值錢幾多﹖十蚊店啲工人有錢人工幾多呀﹖依家金行啲人人工有幾多呀﹖唔好忘記,我哋如果冇咗中國的市場及交往,成個香港冇前途。」

時事評論員劉銳紹則有另一看法,他認為民間及經濟的融合比官方的融合更加有效。
劉銳紹:「官方混淆咗政治性矛盾及民生性矛盾,如有人在上水提出,中國人滾回中國去,呢啲香港人覺得係極端個別例子,國內引伸為港獨,係無限上崗,引致矛盾激化 」

劉銳紹認為特區政府如果能在兩邊同時做工作,效果會好點,但梁振英上任後,引導國內理性認識這些問題的功夫不多,反而比較順應官方意念。如推行國民教育,曾蔭權銜枚疾走的方法﹐但梁振英要立杆見影,要將國民教育獨立成科,更令香港人對國內的感覺更加抗拒。
(製作: 黃燕雯)

專題分類:走過十年

最新專題